Makumbinser kaha si Sara?

Dihang gilusad ang kalihokan nga Duterte PaRin Movement nga nag-awhag kang Davao City Mayor Sara Duterte nga molansar pagka presidente, puno kaayo ang lapad nga social hall sa dakong hotel dinhi sa Sugbo.

Mga lider sa lainlaing kahugpongan ug kabarangayan dinhi sa Sugbo ang nanambong sa maong kalihokan. Kon wa pa gi-limit ang mga motambong, magsugwak tingali ang mga tawo. Maayong sundon ang gihimo nila ni Juniño “Bonito” Padilla, ang national secretary general, ug sa iyang deputy secretary general for Visayas nga si Winley dela Fuente nga gi-limit ang mga motambong.

Giingnan ko ni Dela Fuente nga gisiguro nilang daan nga dili sila makalapas sa social distancing mao nga gi-limit nila ang motambong. Bisan gani ang media, wa kaayo sila mangimbitar. Sa kalihokan, nanumpa ang mga lider nga sila maninguha gyud pagpangampanya pabor kang Inday Sara, kon kini mohukom paglansar sa pagka presidente.

Apan samtang daghan ang mipadayag nga mopaluyo ni Inday Sara, ubay-ubay usab ang nangyamiid kay kuno dili na sila gusto og Duterte.

Apan nabantayan hinuon nako nga kadtong isog kaayong nanaway kang Inday Sara sa ilang mga post sa social media, sila mga dumadapig gyud kaniadto ni Vice President Leny Robredo. Hinuon, ingon man usab niini kaniadto si Presidente Duterte, daghan kaayong nanaway kaniya dihang gituboy siya nga padaganon sa pagka presidente.

Pagkakaron, nagpabiling way kibo si Inday Sara sa pag-awhag sa katawhan nga padaganon siya pagka presidente. Apan nagtuo gyud ko nga kon mosibaw na kaayo ang awhag sa katawhan, dili na siya makabalibad.

* * *

Ang kampo ni Senador Manny Pacquiao nagpaniid ra sa mga lihok ni Inday Sara. Daan na nga si Pacquiao, nga naila sa nasud pinaagi sa pagka maayo niyang boksidor, mipahibawo nga molansar siya pagka presidente.

Gawas ni Pacquiao, anaa usab si Senador Antonio Trillanes nga nagpaabot ra og higayon nga kon si Robredo dili gyud modagan pagka presidente, magpapili siya sa labing taas nga katungdanan sa kagamhanan.

Kanilang tulo, mora’g makaingon kita nga sila si Inday Sara ug Pacquiao maoy adunay igong pundo nga magamit sa kampanya. Gawas nga kwartahan, may mosuporta man gyud ni Pacquiao ug ingon man si Inday Sara.

Si Robredo hinuon, kon siya maoy kandidato sa Partido Liberal, makakuha sab siya og pundo nga magamit sa kampanya ug maisip nga lig-on usab siya nga kaatbang nila ni Inday Sara ug Pacquiao.

Basta kay alegre gyud kaayo ang umaabot nga eleksiyon karong sunod tuig kay gawas sa mga kandidato sa tagsatagsa nato ka dapit, motutok man gyud ta sa mga nagpapili pagka presidente sa nasud.