Pagkuyanap sa COVID-19

Samtang nakahimo pagkontrolar sa kasamtangan ang mga lalawigan sa Sugbo ug Siquijor sa pagkuyanap sa coronavirus disease o COVID-19, kamulo usab nga naghasi ang maong balatian didto sa mga probinsiya sa Negros Oriental ug Bohol sa Central Visayas.

Sulod na sa pipila ka semana ang pagsulbong sa mga kaso sa COVID-19 sa maong mga probinsiya. Sa ulahing talaan sa rehiyonal nga buhatan sa Department of Health, mosubra na sa usa ka libo ang active cases sa matag probinsiya.

Ambot unsang hitaboa ngano nga misulbong man hinuon ang mga kaso sa maong balatian didto sa Bohol ug Negros Oriental. Mugna ba kaha kini sa pagpaluag sa ilang mga health protocols? O basin kumpiyansa lamang ang otoridad sa maong mga lugar kay lagi mas minos man ang populasyon didto kay sa ubang mga highly-urbanized provinces.

Sa atong nakita, dili gyud diay kakumpiyansahan ang coronavirus disease. Kaniadto kuyanap lamang kini sa mga dagkong lugar sama sa Metro Manila, Metro Cebu ug Metro Davao. Apan karon hasta kadtong mga lagyong lugar ang wala na usab pasayloa niining maong balatian.

Sama pananglit sa lungsod nga akong natawhan nga mao ang Tambulig, Zamboanga del Sur. Kaniadto wala kini bisan usa ka sa COVID-19. Apan karon, bisan pa kadtong mga lagyong barangay ang nasudlan na sa maong virus. Gani aduna nay 62 ka active cases ang maong lungsod.

Usa ang Zamboanga del Sur sa mga lalawigan sa nasud diin grabe ang pagkuyanap sa maong balatian karon. Ug sama didto sa ubang mga lugar sa kaulohan, anaa na kini karon sa higpit nga Modified Enhanced Community Quarantine status.

Mao nang adunay usa lamang ka paagi nga atong mapildi ang coronavirus disease sa nasud. Kini mao ang subsob nga pag-arangkada sa programa sa pagpangbakuna sa populasyon gikan sa Batanes ngadto sa Tawi-Tawi aron atong makab-ot ang herd immunity.

Hinuon, samtang atong gipakusgan ang vaccination program, kinahanglan nga padayon usab ang atong higpit nga pagsunod sa mga health protocols. Kay gamay lamang nga luag maghatag na kini og dakong oportunidad sa virus nga moatake.