Tabang nga hinukad sa dughan

Ang pagtabang hinukad gikan sa dughan nga wala magpaabot og balos bisan unsa, wala usab kini magpili kon unsa o kinsa ang motabang ug kinsa ang tabangan.

kini ang gihimo sa usa ka British national nga si Terrence ug iyang asawa nga usa ka Bol-anon nga si Beth sa Guindulman lalawigan sa Bohol.

Una wala ko makaila sa magtiayon, apan dunay nagpadala nako og link sa gipakita nga pagkamaayong tawo nila ngadto sa ilang isig katawo.

Gi-search nako ang ilang background kong tinuod ba, akong nasuta nga tinuod gyud ug mismo ang sender nako niini nga kasayoran nga usa usab ka vlogger nga si Ronald Ancero Casil mimatuod sa pagka good samaritan sa magtiayong Martin.

Nakapatukod na diay og kapin sa 60 ka balay ang magtiayon sa bisan asang dapita sa Bohol dili para kanila kon dili alang sa mga kabus nga walay desenting pinoy-anan.

Mga kongretong balay ang ilang gipahimo sa mga tawo nga dili man gani nila igbaho nga paryente o kaila.

Matud sa Magtiayon nga 100 hangtod sa 1,000 ka balay ang target nilang mapahimo alang sa mga kabus.

Gawas sa mga balay nanghatag usab diay sila og mga baboy, kanding ug ubang kahayopan nga kapanginabuhian sa mga tawo.

Duna usab silay 50 ka mga scholars sa Bohol nga gipahimoan og boarding house ilabi na niadtong wala pa ang pandemic, sila ang nag provide sa tanan nga panginahanglan apil na ang mga gadgets.

Akong gi-post sa social media page ang ilang hulagway ug ang nahimo, nag viral kini og daghan ang nagmatood sa kamaayo nilang tawo.

Tinuod nga vlogger ang magtiayon apan kong tan-awon dili pa gyud ingon ka daghan ang ilang subscriber nga kakuhaan og kwarta nga ikapatukod og mga balay sa ubang mga tawo, sa ato pa gikan sa kaugalingon nilang bulsa ang gigamit.

Kong naa may mga donors at least makita kong asa nahiadto ang kwarta nga dako kaayo og natabang sa mga tawong naglisod karon.

Kong naa may blessings nga nadawat ang magtiayon wala nila kumkoma inay gipanghatag pa nila sa uban dili lang sa pang usa ka adlaw nga tabang kong dili pang long term kay balay, edukasyon ug livelihood man.

Dili sila mga politiko kinsa walay makita nga interest nga balos sa ilang gipanghimo, kini ang geniune nga tabang.

Naa may nabati ug nakita nato nga ubang mga adunahan ug sikat nga personalidad sa nasod nga nagpahimo og mga balay apan mga politiko man, kahibawo na ta unsay gipaabot nilang balos.

Kong nakahimo ang pribadong indibidwal sa pagtabang sa isig katawo nganong dili man mahimo sa uban nga kwartahan labi na ang mga opisyal sa gobierno nga daghan og natigom nga kwarta labi na karong panahon sa pandemic, pang share sad mo diha.

Maayo unta og manakod ang ka maayong binuhatan niining magtiayon nga good samaritan aron daghan pa ang matabangan.