EDITORYAL - Nakadonar sab ang Pilipinas

Bisan sa krisis ug negatibong ekonomikanhong epekto sa pandemiya sa COVID-19 gipahibalo ni Pres. Rodrigo Duterte nga modonar ang Pilipinas og usa ka milyon dolyar  o gibanabanang P50 milyones sa COVAX global vaccine sharing initiative. Ang COVAX gilusad sa World Health Organization  inabagan sa European Commission ug nasud sa France nga ang katuyoan mao ang pagtinabangay sa tanang kanasuran nga makadiskubre, makahimo ug makapanghatag og bakuna batok COVID-19 sa mga kabus nga mga nasud sa kalibotan.

Usa ang Pilipinas sa mga nakabenepisyo sa COVAX sanglit gikan sa bulan sa Marso hangtud ning mosunod nga mga bulan ning tuiga, ang mga bakunang nangabot ug moabotay pa magagikan sa maong pasilidad.

Isip usa ka responsableng nasyon may kaakohan ang Pilipinas sa kalibotan. Tungod kay ang COVID-19 usa man ka pandemiya, dili mahimong mag-iyahay lang ang mga nasud nga makaangkon og bakuna batok niini.

Bisan ang mga adunahang mga nasud sama sa Amerika, United Kingdom, France, Japan, Russia ug China nakasabot nga dili lang sila maoy kinahanglang mabakunahan. Mao nga sila sab ug daghan pang mga kanasuran ang nagtampo-tampo alang sa tinguhang makaangkon og bakuna ang tanang mga nasud, kabus man o adunahan.

Hinuon kaning donasyon gikan sa Pilipinas nga gianunsyo ni Duterte dili na bag-o, tungod kay sa nangaging mga administrasyon nakadonar sab ang nasud alang sa pagkontrol sa pagkatap sa makamatay nga sakit.

Sa panahon ni kanhi presidente Benigno Simeon “Noynoy” Aquino III, nidonar sab og usa ka milyon dolyares ang Pilipinas ngadto sa United Nations sa kampanya niini nga mapakgang ang pagkatap sa makamatay nga Ebola disease.    

Niadtong 1939 ang Pilipinas pinaagi sa Philippine Red Cross mipadala’g mga bakuna ngadto sa nasud sa China. Ang maong mga bakuna ginama mismo dinhi sa Pilipinas gikan sa  Alabang Serum and Vaccine Laboratory nga naghimo og mga anti-smallpox, BCG, anti-diphtheria, ug anti- rabies vaccines.

Gitinguha sa Pilipinas nga mabakunahan ang 70 milyones ka tawo sa kapin 100 milyones nga populasyon niini aron makabaton ang nasud sa gitawag nga herd protection o herd immunity.