Praktikal

Karong adlawa, Huwebes, maoy tagal nga gihatag ni Presidente Rodrigo Duterte sa Department of Health nga mopagawas sa resulta sa ilang pagtuon mahitungod sa polisiya nga gipatuman sa lalawigan sa Sugbo alang sa mga mangabot nga OFWs ug overseas Filipinos.

Human ipresentar ni Gobernador Gwendolyn Garcia ngadto sa presidente ang iyang mga argumento nganong mipatuman ang lalawigan og lahi nga protocol kay sa gimando sa Inter-Agency Task Force, gitahasan ni Duterte ang DOH sa paghimo og pagtuon niini ug pagpagawas sa ilang kumentaryo karong adlawa pahitungod sa protocol sa probinsiya.

Sigun sa mga report, nakasabot ang presidente sa tumong sa gobernador apan mipadayag sab kini nga angayang mosunod ang mga local government units sa nasudnong polisiya.

Ang problema kay wala magkadimao ang nasudnong polisiya. Ang polisiya nga gipatuman sa gobernador dinhi sa Sugbo haum ug mas praktikal.

Tingali mas maayong susihon pagbalik sa IATF ang ilang mga lagda ug tun-an ang posibling pagsagop sa protocol sa lalawigan isip nasudnong polisiya sa mga mangabot nga OFW ug overseas Filipino.

Daghan ang bintaha kun sundon ni sa nasudnong kagamhanan. Usa niini ang dakong kantidad nga madaginot gikan sa gasto pagbayad sa mga hotel nga puy-an sa mga OFW samtang sila ipaubos sa quarantine.

Dako ang gasto sa gobyerno niini sanglit ang Overseas Welfare Administration (OWWA) ang mobayad sa 10 ka adlaw nga gikinahanglang mopuyo ang mga OFW sa hotel.

Kun sundon ang protocol sa probinsiya, makadaginot ang kagamhanan og pito ka adlaw nga bayranan.

Gawas niini ang mga mamauli nga Filipino gikan sa abroad makadaginot sab intawon sa ilang gasto nga di kinahanglang masakripisyo ang siguridad sa publiko.

Ubos sa protocol sa probinsiya ang mangabot nga mga OFW ug ROF mopaubos sa swab test kaduha--- sa ilang pag-abot ug sa ikapitong adlaw bisan tua na sila sa ilang pinuy-anan nagpadayon sa ilang 14 ka adlaw nga kwarantina.

Praktikal ni tungod kay gawas nga makadaginot mas mahatagan og igong panahon ang mga OFW nga limitado ang oras sa bakasyon og igong panahon nga makauban ang ilang pamilya.

Hugot ang mga argumento nga gipresentar sa gobernador ug gani suportado kini og datus nga nagpakita nga ang iyang polisiya wala moresulta og pagsaka sa mga kaso sa COVID nga maoy gigamit nga rason sa IATF nganong ilang gihulga ang gobernador nga kasohan tungod sa wala pagsunod sa ilang gusto.

Ug husto si Garcia nga di mahimong pabiling ihostage ang ekonomiya tungod sa kabalaka nga mosaka ang mga kaso sa COVID.

Mas dako ang mamahimong kadaut nga mahiaguman sa publiko kun pasagdang maguba sa hingpit ang ekonomiya tungod lang sa kahadlok.