Nganong hadlok man sa media?

Nakahinuktok ko nga naghunahuna, kon kining mga kawani sa Bureau of Internal Revenue (BIR) nga adunay mga negosyo, mi-rehistro ba sab kaha sa ilang mga negosyo aron sila makabayad gyud og buhis?

Nagkasultihanay man gud mi og ang suod nakong amigo ug iya ko nga gisuginlan nga pwerteng kutiha kuno kay bisan gamay kaayong negosyo, kinahanglan gyud nga imong irehistro sa BIR.

Nindot unta kon may maka-report nako kabahin sa mga kawani sa BIR nga dunay mga negosyo apan mibaliwa ra sa balaod.

* * *

Nahimuot kaayo ko kaniadtong miaging adlaw kay miadto ko sa BIR.   Nagsul-ob ko sa akong ID sa media, ug giingnan nako ang gwardya kon asa ko makapangutana og dugang inpormasyon.

Gitudlo sa gwardya ang usa ka babaye nga adto ko magpakisayod sa akong tuyo. Apan dihang nagpaila ko nga media, pwerteng nakakisikisi nga dili siya makatagad nako.

Akong giingnan nga dili ko mo-interview kaniya, kondili, magpakisayod lang ko unsaon pagkuha og Certificate of Registration. Sa gihapon, mora’g gigil-asan ang kawani, klaro kaayong lihay sa media.

Ngano kaha no? Aw, hinuon, dihang didto pa ko sa Palace of Justice nadestino, naka-cover ko sa kaso sa usa ka kawani sa BIR nga gitaktak sa serbisyo kay pwerte ka corrupt.

Gani, dunay lakang ang kagamhanan nga bawion ang iyang katigayonan nga wa na motukma sa iyang kinitaan sulod sa pipila ka tuig.

Nalipay lang ko kay dunay laing kawani sa BIR nga wa mahadlok nga mitubag ug miatiman sa akong panginahanglan.

Ang akong ikasulti mao nga kon ang kawani sa kagamhanan wa la’y gikahadlokan ug gustong tagoon, dili gyud sila angay’ng mahadlok sa media, apan kon may gusto ka nga tagoon, lihayan gyud nimo ang media.

* * *

Ako diay’ng klarohon nga sa akong lindog kaniadtong Martes, nasayop ang nasuwat nakong petsa alang sa pagsang-at sa Certificates of Candidacy sa mokandidato sa 2022 Elections.

Ang tukma nga petsa pag-file sa mga COC’s mao ang Oktubre 1 ngadto sa 8, dili Nobiyembre. Sa ato pa, upat ka buwan na lang og mao na ang pagsang-at sa mga COC.

Gani, makabantay mo nga duna nay mga politiko nga mag-anhian sa Cebu aron sila mailhan sa mga botante.

Hatagan gyud nila’g bili ang Cebu kay usa kini sa daghan og mga botante ug makapadaog gyud og national candidates.

Basta kay alegre gyud kaayo ang umaabot nga eleksyon kay apil sa atong pilion ang tawo nga tugyanan nato pagdumala sa atong nasud.

Pero unya na kita mohisgot niini kon mailhan na gyud nato sila. Pagka karon, igo pa sila nga nagpaduda.