Good news

Yano lang ang pagsaulog sa culmination sa Flores de Mayo.

Kinit ungod kay sa daghang mga kakulian apil na niini ang kahadlok nga sa COVID-19 mao nga gihimong minus for the meantime ang gidaghanon sa katawhan ingon man sa kabataan.

Mao nga niadtong Mayo 31, 2021 gisaulog ang yanong Misa sa may alas singko sa hapon ug ang ebanghelyo naghisgot man kalabot sa pagduaw ni Maria Santisima sa iyang ig-agaw nga si Santa Isabel.

Sa maong pagduaw niya niulpot ang bata nga gisabak ni Isabel nga mao si Juan Magbubunyag. Ngano man kaha?

Unsay tumong ni Maria sa Pagduaw. Ang tanan molangkob gyud sa ebanghelyo kun Maayong Balita. Giduaw ni Maria si Isabel aron moambit sa maayong Balita kalabot sa pagmabdos niini.

Ang mga asawa kaniadto nga way anak mahimong sentro man sa pagbiaybiay. Mao nga sa dihang si Juan nahimugso ang maong kaulawan nahanaw.

Sa laing bahin, si Maria nagdala pud og Maayong Balita kay ang iyang gisabak ebanghelyo man pud dili lang alang kang Juan kondili sa tanang mga tawo sa tibuok kalibutan.

Daghang mga tawo ning atong kapanahonan karon ang nahimong mas malipay pa nga magpunay og pangita sa bad news kaysa good news.

Kining maong matang sa kinaiya ato mang masinati diha sa paagi mas daghan pa ang mangita sa imong sayop ug mohimo niining sumsoman sa ilang mga sugilanon sa kadalanan.

Mao nga padayong ni spread out ang negativity kaysa positivity.

Ang mga tawo nga mahiligon sa tsismis mao tong mga tawo nga mahiligon pud sa bisan unsang dubok.

Ang hagit alang kanato mao man ang pagpadayag sa mga maayo ug makapadasig aron sa ingon kitang tanan mamahimong magmalipayon ingon man malinawon ning kalibutan sa kalambigitan.

Kun unsay imong tan-aw sa uban mao man usab ang imong tan-aw sa imong kaugalingon.