In aid of re-election

Nabalaka ang ubang mga miyembro sa Kongreso nga gamiton unya sa pamolitika ang pundo alang sa Bayanihan 3 atol sa piniliay karong Mayo 2022.  Tungod niini, gisugyot nga butangan na daan og proteksiyon sa balaod mismo aron dili maabusohan ang paggamit unya sa pundo.  Usa ra’y paagi nga maprotektahan batok sa mga kanahan ang kwarta sa Bayanihan 3: hulaton lang nga mahuman ang eleksyon una kini gastohon.  Kon dili kini buhaton, bisan ibutang pa ang maong pundo sa bâbâ sa Leyon, makawat ug magamit gihapon kini, dili sa pagtabang sa katawhan, kon dili “In Aid of Re-election”.  Fezteleern!

Dili tungod sa pagsaway

Tuyô sa kagamhanan nga kab-oton ang gitawag nga “population protection” batok sa COVID-19 sa tibuok NCR Plus karong Nobyembre 27, taliwala sa pagpanaway sa mga kritiko sa kahinay sa dagan sa pagpamakuna.  Matud ni Secretary Roque, ang nakadaut kuno sa mga kritiko kay buot sila nga mapakyas ang gobiyerno sa maong programa.  Walay gobiyerno nga napakyas tungod lang sa pagpanaway, kon dili tungod kay walay kabangkaagan ang nagdumala niini.  Sama ra usab nga ang tawo malumos dili tungod kay gisaway siya nga dili siya maantigo molangoy; hinonoa, malumos siya kay dili gyud siya kama-o molangoy.  Mao kanâ!

Maunay sa pangutana

Gikatahô nga adunay 37 ka mga performers sa Pentecost Celebration nga nalandig sa tambalanan tungod sa pagsakit sa ilang tiyan human makakaon og “humba”.  Nabatyagan man unta sa mga biktima nga medyo pan-os na ang “humba” apan tungod sa kagutom, napugos sila pag-kaon niini.  Dakong suliran ang “kagutom” sa atong katilingban.  Usahay, buot nato’ng pangutan-on ang Diyos ngano’ng gitugot Niya nga adunay kagutom nga nahitabo?  Apan kuyaw lang kon isumbalik sa Diyos ngadto sa tawo ang maong pangutana.  Ngángá ang resulta!

Pulos made in China

Alang kang Senador Riza Hontiveros, mahimo na unya’ng kontrolahon sa China ang mga mahinungdanon’g patigayon kon amendahon na ang Public Service Act aron matugtan na ang mga langyaw pagpanag-iya sa mga patigayon nga gitagana lamang kanhi sa mga Pilipino. Dugay na’ng gikontrolar sa mga Intsik ang mga dagkong patigayon dinhi sa Pilipinas.  Walay dakong negosyo dinhi nga dili Intsik ang tag-iya.  Matud pa bitaw sa pagya, “Gibuhat sa Diyos ang langit ug yuta; gawas niini, ang tanan pulos na “Made in China”.  Madahaaan!

Carrier sa sensilyo

Buot ni Senador Villar nga pagawson na ang mga senior citizen labi na kadtong nabakunahan na. Gisupak kini ni Senador Binay tungod kay mahimo gihapon kuno nga ‘carrier or spreader’ sa virus ang mga senior citizen. Tanan tawo posible man nga “carrier o spreader” sa virus, apan dili tanan tawo “carrier” ug salapi sama sa mga senior citizens.  Dili kawad-an og sensilyo si Lola sulod sa iyang panyo nga gisuksok sa may dapit sa dughan.  Buhii na ang mga seniors aron mabuhi pud ang ekonomiya. Payts!