Bakuna

Tumong sa gobiyerno ang pagbakuna sa 70 milyones sa 110 milyones nga populasyon sa nasud aron makab-ot ang herd immunity. Sa tinamban, ang herd immunity mao kini ang makapaputol sa kutay sa tinakdanay sa mananakod nga COVID-19.

Apan maingon nato nga dakong hagit ang tumong sa gobiyerno nga pagbakuna sa 70 milyones sa 110 ka milyon nga katawhan sa Pilipinas tungod kay sa pinakauwahing survey, 30 porsiyento lamang sa kinatibok-ang populasyon ang gustong magpabakona. Buot ipasabot sobra sa 70 porsiyento ang dili gustong magpabakona.

Mao kini ang hinungdan nga gisugyot sa pipila ka mga magbabalaud nga magkuyog sila si Presidente Rodrigo Roa Duterte ug Bise Presidente Leny Robredo sa usa ka infomercial nga mag agni sa katawhan sa pagpabakuna.

Nganong daghan man ang dili magpabakuna? Ang rason nga akong nakita mao ang kasayoran nga nasayran sa katawhan gikan mismo sa gobiyerno nga naghisgot sa pangalan sa mga bakuna nga dili kaayo epektibo ug epektibo apil na ang mga side effects niini.

Tungod sa pagpahibalo sa gobiyerno sa mga bakuna nga nangabot apil na ang pagka epetibo niini ug ang side effects, namili na ang mga tawo.

Mao ni ang rason nga taas kaayo ang mga tawo nga naglinya sa bakona nga Pfizer samtang gilangaw ang laing brand sa bakona.

Giingon na karon sa gobiyerno nga pariha ra ang epikto sa bakona bisan pa og dili pariha ang ilang efficacy rate.

Bisan pa maglisod ta pagtuo nga pareha ra ang pagka epektibo sa bakuna bisan dili pareha ang gitas-on sa efficacy rate niini, motuo lang gyod ta sa sulti sa mga eksperto o mga hanas kay sila man ang may otoridad sa pagsulti niini. Mosunod na lang ta sa ilang sulti bisan pa ang nagduha-duha ta sa pagtuo.

Ang pinakamahinungdanon makab-ot nato ang herd immunity nga makapaputol sa tinakdanay sa COVID-19. Busa magpabakona na ta.