Nanghambog

Gikakita nako ang akong suod kaayong amigo, usa na ka senior citizen. Pwerte niyang panghambog kay nabakunahan na kuno siya og pangontra sa coronavirus.

Giingnan ko niya nga pwede na gani nga dili siya magsul-ob og mask kay kaduha na siya nabakunahan. Ako siyang gitutokan ug sa hilom nakaingon ko nga daghan gyud ang wa masayod.

Ang tinuod, bisan pa og kaduha ka na mabakunahi og pangontra sa COVID-19, dili kana makapugong nga matakboyan ka sa maong makamatay’ng sakit.

Matud sa mga eksperto, nga matakdan gihapon ka og COVID-19 bisan og nabakunahan ka na og kaduha, apan posible nga dili na kaayo mograbe ang imong sakit.

Busa, bisan og nabakunahan na kamo og kaduha, ayaw tawon panghambog nga dili na madaktan. Ang inyong buhaton mao ang pagtuman gihapon sa mga gimando nga health protocols.

Mag-mask gihapon, ug mas bentaha gani nga mag-face shield gyud, aron nga layo ra ang posibilidad nga matakboyan ka og COVID-19.

Ibutang nato nga dili ka na mamatay kay nabakunahan ka na man, unya kay matakdan ka man gihapon og COVID-19, sa ato pa nga mahimo ka pa nga makapatakod sa ubang tawo.

Usbon nako, bisan og nabakunahan na kamo og pangontra sa COVID-19, tumana gihapon ang gimando nga mag-mask ug mag-face shield, unya likayan ang panagdikit.

* * *

Tinuod, posible nga momahal ang prisyo sa tubig nga ibaligya sa MCWD kanato kon mosugod na sila pagkuha og suplay desalinated water.

Ang “desalinated water” tubig kini sa dagat nga gi-process gamit ang mga modernong kahimanan, ug gikuhaan sa parat, aron nga mahimo na nga imnon.

Base sa pasiunang kwentada, gamay ra gyud kaayo ang pagsaka sa prisyo. Nakasabot ko nga dunay uban nga moreklamo, apil niini ang pipila ka sakop sa media.

Wa man gud sila masayod nga sa ubang mga dapit dinhi sa dakbayan, wa makaserbisyo ang MCWD tungod kay kuwang ang suplay sa tubig, ilabi na kon magkwaresma.

Sa mga dapit nga nihit ang tubig, ang mga lumolupyo mapugos gani pagpalit og tubig nga P500 ang usa ka tangke nga gipatuo sa nagbaligya nga mosulod kuno og lima ka baril, apan ang tinuod upat ra og tunga.

Ako mismo, nakapalit og tubig nga gibaligya sa among silingan sa mao nga kantidad. Agwanta kay ang tubig maoy labing kininahanglan sa tanan.

Bentaha na lang gani kon way kuryente kay mahimo man nga magsuga og lampara, ug mamaypay lang kon bation kita og kainit, apan kon way tubig, asa ka man og ilung-ag, ikaligo, ipanghugas?

Kini maoy angay’ng hinuktokan sa kadaghanan.

Nagkadaghan ang mga building, condo, panimalay apan ang suplay sa tubig mao ra gihapon.