Pagkatamilian

Human sa pipila ka bulan nga paningkamot sa nasyonal nga kagamhanan nga miani og daghang batikos tungod sa giingong kahinay, miabot na sa Pilipinas ang daghang doses sa bakuna batok sa coronavirus disease o COVID-19.

Signal kini sa pag-arangkada na sa kusog nga programa sa pagbakuna sa Luzon, Visayas ug Mindanao.

Mao na kini ang gihulat sa kinabag-an Pilipinhon aron lagi malibre kita gikan sa hulga niining makamatay nga balatian.

So, atong gitan-aw karon nga mas miarang-arang na ang atong kampanya batok sa coronavirus disease. Ug naglaum kitang tanan nga makabaton unya kita og herd immunity sa sunod tuig o sa labing daling panahon.

Apan mitumaw na usab kining mga yangongo sa pipila kabahin sa probisyon sa bakuna. Kay daghan kuno ang tamilian nga gusto og mas primera nga klase sa bakuna sama sa mga gibuhat didto sa Estados Unidos ug Europa batok sa COVID-19.

Mao nang gimando ni Presidente Rodrigo Duterte sa DILG nga dili na ipublikar sa mga lokal government units ang unsa mang bakuna nga itusok sa ilang mga konstituwente. Kini aron kalikayan ang pagpili sa ilang gusto nga bakuna.

Tungod kay kabahin na kini sa atong kultura, sakit na natong mga Pinoy ang pagkatamilian. Mas gusto nato ang mga produkto nga stateside kay sa lokal. Mao nang mas mo-click nato ang mga butang gikan sa Amerika ug ubang adunahang nasud.

Apan, niining panahon sa pandemiya, dili na kita angay mamili pa kon unsang bakuna ang angay itusok kanato. Sinovac man o Pfizer o AstraZeneca o Moderna o unsa man kana, kining tanan gibuhat nga pangontra sa COVID-19.

Ang importante mao nga dunay bakuna nga gitagana na alang sa matag-usa batok sa maong sakit. Atong wad-on ang atong pagkatamilian kay mismo ang atong survival na ang nakataya niining sitwasyona. Busa, kon unsay available nga bakuna, sige patusok na.