Seryoso o komedya

Dili papaulion o papahawaon ni Presidente Rodrigo Roa Duterte ang mga barkong iggugubat sa Pilipinas nga nagpatrolya sa West Philippine Sea. Matud pa sa Presidente nga angayan lang nga magrespitohay ang Pilipinas ug China. Apan kun magkinaunsa, dili gayod papahawaon ni Presidente Duterte ang mga barkong iggugubat sa Pilipinas bisan pa og patyon siya sa China ug dinhi maputol na ang paghinagalaay sa duha ka nasud.

Seryoso si Presidente Duterte sa iyang baruganan sa dili pagapauli o pagpapahawa sa mga barkong iggugubat sa Pilipinas nga nagpatrolya sa West Philippine Sea. Sa akong tan-aw, gipakita sa presidente ngadto sa iyang mga kritiko nga sayop sila sa ilang gituohan nga gihatag na lamang sa presidente ngadto sa China ang teritoryo sa Pilipinas nga nahimutang mismo sa sulod sa Exclusive Economic Zone niini.

Apan nabalaka lang ko sa pagkaseryoso sa presidente. Ang akong gikabalakan, basin og komedya ra gihapon kini ni Duterte. Seryoso man god ning atong presidente kun magkomedya maong ang mga tawo motuo niya sama sa iyang jet ski nga komedya.

Nakahinumdom man god ko niadtong 2016 Presidential Election diin gipangutana si Duterte kun unsa ang iyang sulbad sa suliran sa West Philippine Sea diin ang iyang tubag moadto siya niini sakay sa jet ski dala ang bandila sa Pilipinas nga iyang iugbok sa maong dapit aron ipakita ngadto sa China nga iya sa Pilipinas ang dapit. Apan lima ka tuig ang nakalabay human niya gibuhian ang maong pamahayag, iyang giingon nga komedya ra kini ug iya pang gipangutana ang mga tawo nganong mituo sa iyang komedya.

Usahay magduda ug maglisod na ta sa pagtuo sa presidente sa iyang pangluwatan nga mga pamahayag kay iya mang gihimong komedya ang presidency.

Hinaut pa unta nga tinuod na ang pagkaseryoso sa presidente ug dili lang kini lain napod nga komedya niya.