Dekada na kapin

Mayo 16, 2021: Domingo sa pagsaka sa Langit sa atong Ginoo (Catholic Communications Sunday)

Mga Pagbasa: Buh. 1;1-11/Sal. 47/Ef. 1;17-23/Mk. 16;15-20

Gipangutana ko sa akong mga higala kun pila nako ka tuig nga nagsulatan ning maong Banat News nga mantalaan.

Ako silang giingnan nga mga dekada na kapin. Nahinumdom pa ko kaniadto sa dihang seminarista pa ako, mosakay ko og jeep gikan seminary aron lamang makahatud in person sa mga sinulat saksi si Mam Mila Cruz Tigue niini kay siya  man gyud tawon ang tigdawat niadto hangtud gani karon.

Mao nga giisip ko usab kini nga bokasyon hangtud gani karon kay bisan pa man sa mga sugilanon nga natagik na sulod sa dugay na nga panahon, kahigayonan gihapon kini aron mas mapalapdan ko ang akong pagwali ug pagtudlo ug dili lang diha kutob sa pulpito.

Karong Dominggoha nahimong daw gipahigmata kita sa buhing kamatuoran nga gamhanan baya gyud ang social media sa mga nagkadaiyang platforms. Sa laktod nga pagkasulti mahimong mas madali ug paspas ang pagpakuyanap sa pulong sa Dios ngadto sa nagkadaiyang hut-ong sa mga tawo ning atong katilingban.

Dili pa lang dugay nagsunodsunod baya gyud ang mga it’s a prank pronouncements nga nagdala og tumang kalibog sa kinabag-an.

Daw sa nagkahanap pa sa diyes panas ang atong katilingban.

Asa naman kita karon? Unsay tinuod nga news ug unsay fake? Nganong mas mikuyanap man ang fake news?

Tingali tungod kay ang fake news mas nindot man paminawon mao nga daghan nato ang nahimong komportable.

Sa nahitabo karon mamahimong usa ka minarama nga lihok ang nagpasiugda sa dakong kalibog. Kay sa akong personal nga panahom nakita ko nga daw ilang gihimong ubos ang atong self-esteem pinaagi sa pagpahigmata kanato nga ang tanan bisan unsa ka dakong seryoso mahimo raman diay himoong usa ka dakong joke.

Gani gipakapinan pa nga kadtong mga nisalig sa iyang pagarpar mga hanggaw.

Hinuon dili ikatilingala kay kun unsay imong panlantaw sa imong kaugalingon mao man pud ang imong panlantaw sa uban.

Apan ang pulong sa Dios kamatuoran ug dili gyud mahimong usa ka dakong scam.