Pangisog human sa pagkakak

Human sa iyang kakak nga nilanog sa tanang suok sa nasud, nangisog si Presidente Rodrigo Duterte pagpanalipod sa West Philippine Sea (WPS) gikan sa pangangkon sa China.

Human nisurender nga walay dag-anan ang Pilipinas maong di na lang mag-usik-usik sa kinabuhi sa Pilipinhong mga sundawo, nideklarar ang presidente nga andam siyang magpakamatay ug tapuson ang suod niyang pakighigalaay sa China.

Nindot paminawon ang bag-ong sulti sa presidente. May gamay lang problema. Maglisod na pagtuo ang katawhan niya human nilikoy nga komedya ra diay ang labing seryoso niyang mga saad sa una.

* * *

Aron pagbawi sa grabeng kauwawan sa pagsibog sa debate nga siya ang nanghagad, nagpalaban si Presidente Duterte sa mga sakop sa iyang gabinete sa sunudsunod nga mensahe sa nasudnong telebisyon nga mas subsob pa kay sa mas gikinahanglan untang katin-awan sa kapakyas sa pagbadlong sa COVID-19, nga nisamot hinuon pagsulbong usa ka tuig human sa pandemiya.

Inay moatubang ni retired Supreme Court Senior Associate Justice Antonio Carpio, ang presidente nagpahipi sa mapanagan-on nga pagdupa nilang Foreign Affairs Secretary Teodoro Locsion, Defense Secretary Delfin Lorenzana ug ubang pakapin niyang mga turutot.

Advertising
Scroll to continue

* * *

Nabantang hinuon nga gihatagan sa presidente og mas dakong importansiya ang pagpakauwaw nilang Carpio ug ubang Pilipinhon nga igo lang niawhag niya sa pagpanalipod sa WPS, kay sa pagbadlong sa China nga nagpatuyang sa pagsakmit og mga isla, pagtukod og mga baseng militar ug pagpanghasi di lang sa atong mga mangingisda kon dili hasta sa atong kasundalohan.

Imbes panalipdan ang nasudnong sobereniya, nagpasalamat sa China sa donasyon nga bakuna ug gitahan pa gyod ang Julian Felipe Reef pinaagi sa pag-ingon nga di diay kabahin sa nasudnong teritoryo.

* * *

Nakamatngon tingaling nasubrahan rang pagtila sa China tungod sa utang kabubut-on sa mga pabor nga siya ray nahibawo, napugos pagluwat og laing mensahe ang presidente pagpakita nga nangisog na siya ug pagsubli sa bun-og nang pasalig sa kaandam pagpakamatay sa WPS.

Pero unsaon pagkumbinser ang katawhan nga moadto siya sa WPS nga komedya ra mang jet ski sa Spratlys ug mga istupido ra may nituo (nga posibleng naglakip sa 16 milyones nga nibotar niya) kay di kamaong molangoy ug kutob ra man diay sa kakak?

* * *

leolastimosaa@gmail.com

Show comments