Hinaut nga mapiskan sa kaisog
Gisukwahi sa usa ka kanhi sundawo ang pangangkon ni Presidente Rodrigo Duterte nga tungod sa iyang kasuod ni Presidente Xi Jinping way isla sa Pilipinas nga gisakmit ang China sukad sa iyang pagpuli sa Malakanyang sa 2016.
Ang kanhi sundawo mas kasaligan kay sa laing kanhi sundawo, kanhi Kongresista Gary Alejano nga maoy unang nibisto sa pagsakmit sa China sa Cay Island niadtong 2017, kay nadestino sa Kalayaan Island, nga maoy kinadul-an sa Cay, sa aktibo pang opisyal sa Philippine Air Force (PAF). Siya sab karon ang mayor sa Kalayaan.
* * *
Sukwahi sa pag-insistir ni Presidente Duterte nga igo lang nagpatrolya ang China sa Cay Island, si Mayor Roberto del Mundo niingon nga ang China nag-okupar na sa isla:
Gilibotan sa mga barko sa Coast Guard ug Navy sa China ang Cay tibuok adlaw ug gabii, gani morang siyudad magabii tungod sa mga suga sa tanang barko;
Giabog sa mga barko sa China ang Pilipinhong mga mangingisda gikan sa Cay ug kasilinganang sandbars nga maoy naandan nilang pangisdaan; ug
Usahay magpalupad ang China og mga helikopter nga makapakugang bisan sa mga sundawo nga nadestino sa Kalayaan.
* * *
Di kasabot si retired Supreme Court Senior Associate Justice Antonio Carpio nganong hangtod karon, upat ka tuig na human sa pagsakmit sa Cay Island, wa pa gyuy diplomatic protest nga giluwatan ang Department of Foreign Affairs (DFA). Nabalaka siya nga magapos ang Pilipinas sa doctrine of acquiescence kon magpadayon sa pagpakahilom.
Nagduda hinuon si Carpio nga way gihimo ang Malakanyang, bisan sa dakong hiwa sa atong teritoryo sa West Philippine Sea (WPS) kon makuha sa China ang Cay Island, aron lang kadasonan ang dakong bakak ni Presidente Duterte sa WPS.
* * *
Dungang nanagan silang Presidente Duterte ug del Mundo niadtong 2016 batok sa mas lig-ong mga kaatbang. Nakatabang ang maayong labok sa paghupot sa ilang kanhi katungdanan, si Duterte isip mayor sa Davao City ug si del Mundo isip kapitan sa Pagasa, bugtong barangay sa Kalayaan.
Nalab-as ang termino ni del Mundo sa 2019 tungod sa iyang pagpanalipod sa mga molupyo atubangan sa pagpanghasi sa China. Hinaut nga mapiskan si Presidente Duterte sa iyang kaisog para sa nasud ug katawhang Pilipinhon.
* * *
- Latest
