Di mga kaliwat ni Lapu lapu
Daghan ta og ikapasangil sa mga politiko sa Sugbo pero di sila matulisok nga di kamao nga molantaw sa ilang politikanhong kaugmaon. Dihang giinsulto sila ni Senador Bong Go, nga nipili sa ika-500 nga sumad sa kadaugan sa Mactan niadtong Abril 27 aron kawaton ang kagikan ni Lapulapu, nagkahiusa silang tanan sa pagpakahilom.
Kay gawas sa kaduol ni Go sa luwag nga tinubdan sa politikanhong mga pabor, nagtuo sila nga ang sayop niyang pangangkon gikan sa mas taas nga opisyal nga maoy makahukom patyon o palambuon bang ilang politikanhong mga ambisyon.
* * *
Ug sakto sila. Kay sa iyang diskurso sa Maguindanao niadtong Martes, lab-as pang iyang kakak sa debate uban ni retired Supreme Court Senior Associate Justice Antonio Carpio nga siya ra say nanghagit, si Presidente Rodrigo Duterte nidason sa pangangkon ni Go.
Salamat nga mas mat-an pa sila sa pinya, naluwas ang mga politiko sa Sugbo sa mas dakong kaapiki: Kulatado sila kay wa kabaraw sa pagkawat sa atong labing bantogang bayani, mas bakikaw pa gyod kon nikurihir silang Go aron lang mobakwi sa ilang kaisog kay nitingog nang presidente.
* * *
Bisan sa ilang kasuhito sa kamada sa politika, di morisgo ang mga politiko sa Sugbo sa pagbasa sa postura sa presidente: Nagkomedya ba lang siyang Tausug si Lapulapu sama sa saad pag jet-ski sa Spratlys, pagpapas sa ilegal nga drugas sud lang sa tulo ka buwan, pagsulbad sa pangurakot, pag-usab sa sistema sa gobiyerno ug pagpapas sa kakabos?
O seryoso siya sama sa pagpapriso ni Senador Leila de Lima ug pagpalagot ni Chief Justice Maria Lourdes Sereño?
* * *
Hinaut nga hinumdoman sa mga politiko sa Sugbo ning hiniusa nilang pagtalaw. Aron nga di sila masayop sa pagpangangkon sa mosunod nilang mga diskurso nga kaliwat silang Lapulapu. Kay kuyaw kon tinuod ang pagtuo sa mga Oponganon nga si Lapulapu ang nagpatay sa pipila sa mga politiko sa una.
Pasalamat na lang ta nga wa moliwat si Lapulapu sa atong mga lider sa nasud. Kay sama sa ilang gihimo sa Julian Felipe Reef ug sa tibuok West Philippine Sea, hagbay ra tingaling gitahan ni Lapulapu ang Mactan. Ug wa untay mangilog sa iyang kabayanihon karon.
* * *
- Latest
