Makalipong nga mga balitok

Palihog panggunit sa imong lingkoranan kay nia nang lista sa makalipong nga pagbalitok sa makadaghan uyamot nga higayon ni Presidente Rodrigo Duterte sa pagpatuman sa makasaysayanon nga kadaogan sa gisundan niyang administrasyon ni kanhi Presidente Benigno Aquino III batok sa pangangkon sa China sa tibuok South China Sea:

Dihang nangampanya pa sa pagka presidente, nipasalig si Presidente Duterte sa pagsuporta sa kaso sa Pilipinas batok sa China nga nag-ung-ong pa sa Permanent Court of Arbitration (PCA) sa The Hague;

Dihang gibasura na sa PCA ang “nine dash line” nga pangangkon sa China niadtong 2016, niingon si Presidente Duterte nga iyang ipadaplin ang arbitral ruling pabor sa direkta nga pakigsabutsabot sa China;

* * *

Sa Hunyo 2019, nipasalig si Presidente Duterte sa pagpangita og hustisya para sa mga mangingisda nga diriyot mangamatay human gibanggaan ang F/B Gem Ver sa Recto Bank sa barkong Yuemaobinyu 42212 sa China nga maoy napamatud-ang sad-an;

Sa iyang State of the Nation Address (SONA) niadtong 2019, gideklarar sa presidente nga ang mas suod nga relasyon uban sa China di makapahuyang sa pangangkon sa Pilipinas sa West Philippine Sea (WPS);

Advertising
Scroll to continue

* * *

Usa ka buwan human sa SONA, nagtagbo silang Presidente Duterte ug Chinese President Xi Jinping ug nagkauyon nga isalikway ang arbitral ruling aron nga makasugod na ang joint exploration sa gituohan nga abundang suplay sa lana sa WPS;

Sa Abril 2020, nipasaka og duha ka diplomatic protests si Foreign Affairs Secretary Teodoro Locsin Jr. batok sa pagtukod sa China og bag-ong distrito nga mokontrolar sa Kagitingan Reef ug sa pagtion og radar gun sa Chinese warship batok sa barko sa Philippine Navy sa kadagatan sud sa teritoryo sa Pilipinas;

* * *

Sa iyang diskurso sa General Assembly sa United Nations sa Septiyembre 2020, nideklarar si Presidente Duterte nga ang arbitral ruling kabahin na sa international law ug di na mahimong usbon, lasawon, sabutsabotan, o barawon ug iyang supakon ang bisan unsang pagsuway sa pagbabag ini; ug

Sa iyang panghagit og debate ni retired Supreme Court Senior Associate Justice Antonio Carpio sa niaging semana, niingon si Presidente Duterte nga ang arbitral ruling usa ra ka piraso sa papel nga mahimo niyang ilabay sa basurahan.

* * *

leolastimosaa@gmail.com

Show comments