Papahawaon ang nagtikad sa yuta

Dear Atty. Divine,

Ang akong mama ug papa gusto nang papahawaon sa among gipuy- an nga yuta sud na sa 36 ka tuig. Ang akong parents naghatag og bahin sa owner sa ilang income sa yuta hangtud nga kini gitamnan og lubi.

Karong bag-o gipahibawo sila sa tag-iya nga papahawaon  na ug kon di sila mopahawa sud karong buwana ipa-demolish daw sila.

Wa man lang sab gyud sila hatagi og igong panahon nga makakita og laing lugar nga kabalhinan. Unsay angayang buhaton sa akong mga ginikanan? Daghang salamat.

Irene

* * *

Dear Irene,

Kun ang imong mga ginikanan nagtikad sa maong yuta sud na sa taas nga katuigan, makonsiderar na silang nga saup o tenant ug busa dili sila basta-basta nga mapapahawa sa land owner.

Apan importante kaayo nga masuta una kun saup ba ang imong mga parents o dili.

Ang una nilang buhaton mao ang pagdangop sa Dept. of Agrarian Reform or DAR.

Aduna kitay balaod nga nagprotihir sa mga saup  ug ang DAR ang angayang moresolbar niining maong isyu.

Mas maayo nga mopadangat mo og reklamo sa DAR ug sultihi lang ang DAR nga ang imong mga ginikanan maoy nagtikad sa maong yuta sud na sa kapin sa  30 ka tuig. Thanks and God bless.

Atty. Divine

* * *

Alang sa inyong pangutaba, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.