_banat
^

Luha sa inahan

JAV BANATI - Javier Yntig Tapulado (Banat) - May 12, 2021 - 12:00am

Lainlain ang kahulogan nga gidala sa agos sa sa mga luha sa inahan.

May inahang mohilak sa kalipay. Kay tapos sa taas panahong nangayo siya ug iyang bana og anak sa Ginoo, sa kataposan gidungog ra gayod ang ilang pag-ampo. Dili lang himsog ang gasang gihatag sa Diyos kanila. Guwapo pa gyod!

Usab, anaay nanay motiyabaw sa labihang pagmahay.

Sanglit, naguol unsay ipakaon niining bunga sa iyang kahuyang human molayas-palayo ang amahan, kinsa nagpatuong ulitawo, unya kalit lang nahanaw kay minyo diay.

Dakong suliran, nga usahay magbansiwag sa kamantalaanan, nga dunay bag-ong natawong anghel, kinsa gisulod sa karton ug gilabay sa basurahan.

Diin, tungod sa grabeng kaguol, hasta inahan, kinsa nagtuong wala nay nagmahal human gisalikway sa nasukong ginikanan, milayat na lang sa taytayan aron matapos tanan.

Hinuon, may inahang wala magsalig sa kahago sa iresponsableng amahan sa iyang anak.

Gani, mao pay mibiya sa adik-adik niyang bana dihang ang tanang suweldo gihurot paggasto sa gidiling bisyo ug mao pay mangayog kuwarta para ipalit og shabu.

Manghulga pang patyon ang asawa kon balibaran. Haskang paita!

Higala ko ang maong inahan. Milampos siya dili lang sa pagpahilayo sa iyang bana.

Kondili, sa grabe pod niyang kayod aron mahataga’g kaugmaon ang tulo niya ka lalaking anak.

Trabaho ug negosyo iyang gisudlan. Resulta, nadato siya. Napaeskuyla niya iyang mga anak sa mahalong eskuylahan. Ug sayonsayonon na lang ang pagpalit og sakyanan.

Unya usa ka higayon, nakita ko siyang naghilak samtang nagsud-ong sa mga guwapo niyang anak.

Matud niya, inig ka minyo kuno nila, mobiya niya kay motipon sa kapikas aron maghimog kaugalingon nilang salag. Segurado, nga mingawon gyod siya.

Sa miaging Mayo 1, kasal sa akong anak babaye, mihilak sab ang mama sa nabana ni Jera.

Retired military official baya ang husband sa akong kumare.

Pero, wala gyod kapugong sa iyang paghilak. Hinuon, atubangan sa mga dinapit, siya mipasabot, nga tanan niyang anak iyang gihigugma’g gipangga.

Ug kon mahimo pa lang nga ibalik si Jude og sulod sa tiyan niya, iya kining buhaton.

Sanglit, gusto siya nga mahimo kining tipik sa iyang kahiladman hangtod sa kahangtoran. Pagkatalagsaong gugma sa inahan nga seryosong gipalanog-padayag sa iyang mga luha!

GOD
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with