Nagapos sa iyang lipatlipat
Haskang lipaya ni Presidente Rodrigo Duterte sa pasalig ni Presidente Xi Jinping sa China atol sa Boao Forum for Asia (BFA) niadtong Abril 2018, ikatulo na nilang panagtagbo sukad sa iyang pagbanos sa Malakanyang sa 2016, nga iya dayong gipanabi sa tanang ganahan nga naminaw.
Gani, gidetalye niya ang saad ni Xi sa iyang diskurso sakay sa BRP Davao Del Sur sa Philippine Navy pagka sunod buwan: “We will not allow you to be taken out from your office, and we will not allow the Philippines to go to the dogs.”
* * *
Ang saad ni Xi maoy gitumbok ni retired Supreme Court Senior Associate Justice Antonio Carpio nga maoy posible nga rason nganong nilikoy si Presidente Duterte sa pagtahan sa tibuok West Philippine Sea (WPS) ngadto sa China.
Ang hubad ni Carpio mao nga nakumbinser si Duterte nga ang pasalig ni Xi maoy kinalig-onan nga garantiya nga magpabilin siya sa gahom. Maong gihimo niyang tanan pagpakita ni Xi nga tinuod siyang higala pinaagi sa paghangop sa tanang gipasalig nga tabang sa China ug pagbasura sa nangaging kauyonan uban sa mga Amerikanhon.
* * *
Dayon niyang adto sa Boao, nipasangil si Presidente Duterte nga nagplano ang Central Intelligence Agency (CIA) pagpatay niya. Mahimong nagpalaban ni Xi maong nakadawat sa pasalig nga di siya matangtang sa katungdanan.
Ang panghimakak sa Estados Unidos wa kapapas sa dugoong kasaysayan sa CIA pagpanghilabot sa ubang kanasuran. Kasagarang maniubra nipalihok sa lokal nga kasundalohan. Nga posibleng maoy hinungdan nga gidoble ni Presidente Duterte ang ilang suholan bisan nabiyaan ang mas dinaliang panginahanglan sa katawhan.
* * *
Pero nilikoy na sang presidente karong bag-o: Gipasud sa WPS ang mga barko sa gubat sa Estados Unidos ug gitugotan ang Balikatan military exercises sa mga sundawo sa duha ka nasud.
Nisunod ni sa gikatahong kasuko sa aktibo ug retiradong mga opisyal sa militar sa iyang kalubay sa China.
Pero sa niaging semana nilikoy na sab siya: Nipahinumdom sa dako niyang utang kabubut-on sa China ug nikumparar sa kadaogan sa Pilipinas sa Permanent Court of Arbitration nga piraso sa papel nga mahimong ibasura. Gi-balanse ba lang ang nagkasungi nga mga puwersa o nagapos na sa iyang naandang duwa sa lipatlipat?
* * *
- Latest
