Managsunging baruganan

Tuig 2016 sa dihang nihimo pa sila og kampanya, ang kasamtangang presidente Rodrigo Roa Duterte nihimo og hugtanong pamahayag nga bahala na kuno kun unsay mahitabo iyang itanom ang banderang Pilipinhon sa Spratleys inig sakay niya sa jetski. Pagpaila kini nga  kita maoy tag-iya sa West Philippine Sea.

Makabungog nga pakpak ang iyang nadawat. Nagbunga ang maong pagarpar kay nagmadaugon man siya sa nilabay nga piniliay.

Apan sa laing bahin ning ulahi nga mga adlaw daw nahimong apologetic mismo ang atong mga opisyal ug nahimong mga submissive ra kaayo sa kapritso sa China.

Kining pandemiya nga gikan kanila mao man nuon ang naghimo kanatong daw mga ulipon ning panahon nato karon sanglit ang atong mga lideres daw sa nagdasig man kanato sa pagpaubos sa atong kaugalingon.

Ning ulahing mga adlaw gitataw niya nga wala na gyud siyay mahimo pa ning  maong hitaboa karon nga ang nasud walay mahimo sa pakigbatok ning maong higanteng mga insik.

Pun-an pa nga dunay mga linalang ambot kun unsay anaa sa ilang mga hunahuna nganong nahibuot nilang usbon ang dagan sa sugilanon sa atong nasudnong kasaysayan. Ingon ini na gyud tingali kadasig ang ilang mapanghimaraotong panahom.

Ginaingon  nga dunay Urban Dictionary ug gani ang iyang bansagon nakabaton man og kaugalingong kahulogan nga scam.

Sa ato pa, mahimong gamiton kini ingon nga kabahin sa hataas nga mga diskurso sa mga termino nga haguka. Unsaon na lang kun kini maoy  magdaghan.

Pun-an pa sa usa ka appointed son of God nga  nangangkon nga siya maoy katapusang mopirma sa kaluwasan natong mga tawo.

Naunsa naman tawon ni sila karon? Illusion of grandeur? Ang illusion of grandeur mao ang kahimtang diin ang usa ka tawo nagtuo nga kun wala siya walay igong kisaw ang kalibutan.

Ingon ana sila kahunat kun maghisgot kita og pagkagamhanan. Pastilan! Ning mga tungora ningsanay na sila!

Ang maong panagsungi sa baruganan maoy dugokan sa mas daghan pang mga kagubot ug kawalay kapaingnan.

Tingali gaba na kini kay ang boto nga sagrado ato raman giyama yamaan pinaagi sa paghakgom sa tag biyente nga salapi nga bugtong gikalipayan sa daklit apan sa daghang mga katuigan kanato gyud magsakit.