Alegre na ang politika

Napanid-an nako nga ang mga tigpasiugda sa illegal swertres dinhi sa Dakbayan sa Sugbo miundang kadiyot sa ilang operasyon pagbaligya og mga number combination diha sa ilang mga outlets daplin sa karsada.

Tingali, nangahadlok sila kay nianhi sa Sugbo si Royina Garma, ang general manager sa Philippine Charity Sweepstakes Office (PCSO), ug miawhag sa kapolisan nga pangdakpon ang nalambigit sa illegal swertres.

May kaila ko diri sa Nivel Hills sa Lahug nga nag-operate og illegal swertres miingon nga giingnan kuno sila sa higala nilang polis nga mohunong usa sa ilegal nilang operasyon kay palinawlinawon usa.

Pinaagi niini, nakaingon ko nga may kakonsabo gyud diay ang mga nagpadagan og illegal swertres diha sa kapolisan mao nga wala lang sila pangdakpa. Napamatud-an na gyud ang akong katahap.

Kay tiaw mo, si Mayor Edgardo Labella mimando na ni Koronel Josefino Ligan, ang director sa Cebu City Police Office, nga paspasan pagpanakop ang mga nagpadagan sa illegal swertres, apan wa motuman.

Gibalikbalik na nako pagpasabot nga kanang mga gagmay’ng kahon nga gibutang diha sa lainlaing dapit, nga ang nagbantay moisyu lang og sinuwat nga numero nga kunohay tiket, ilegal kana.

Unsaon pagkahibawo sa PCSO nga may gipalit nga maong kombinasyon sa numero? Makadawat ba og buhis ang kagamhanan gikan sa kita sa maong mga illegal swertres operator?

Usbon nako, kon ako pa si Koronel Garma, ireport nako kang Presidente Duterte ang mga polis nga nagkiyugpos lang ug gipasagdan ang maong mga illegal nga sugal, aron sila silotan.

* * *

Mora’g nakadungog ko nga daghan kaayo nga mga iladong tawo nga nagtinguha nga magpapili pagka kongresista sa north ug south district dinhi sa Cebu City.

Si Konsehal Niña Mabatid miingon gyud nga hugot na ang iyang baruganan nga modagan siya pagka kongresista, ug gani daghan na siya’g gimik nga gihimo.

Pero, ang usa nako ka kaubang media miingon nga nakumbinsir na kuno si Mabatid nga magpasubli na lang kini pagka konsehal, ug si Konsehal Raymond Garcia ang modagan sa Barug-PDP.

Apan gitawgan nako si Konsehal Garcia, ug matud ni Raymond nga wa pay klaro kay ang ilang grupo maoy magpili kinsa ang molansar pagka kongresista.

Sa BOPK, nagtuo ko nga si Konsehal Franklin Ong maoy modagan kay nagsige na man siya’g libotlibot sa kabarangayan.

May misulti usab nako nga mobalik paglansar si Mayor Edgar Labella apan way klaro kon sila pa ba si Vice Mayor Mike Rama ang magpares.

Nadunggan nako nga si Rama maoy padaganon pagka kongresista sa south district, ug ambot madayon ba nga anak ni Kongresista Bebot Abellanosa ang padaganon sab sa BOPK puli sa iyang papa.