Mosaler kaha?
Sa iyang pagbisita sa Sugbo sa niaging semana, usa sa gisusi ni Department of Transportation Secretary Arthur Tugade ang proyekto sa bike lane nga kamulo nga giimplentar dinhi sa dakbayan sa Sugbo.
Kabahin sa milyones nga proyekto mao ang paggahin og espasyo sa mga nag-unang karsada sa siyudad alang sa mga biseklita. Kini mao ang katumanan sa damgo sa mga bike enthusiasts nga dugay rang nangandoy og bike lane.
Sa inspeksiyon ni Secretary Tugade, paspas ang agi sa maong proyekto didto sa South Road Properties. Nindot ug lapad ang maong bike lane kilid sa Cebu South Coastal Road (CSCR) nga mo-complement sa kaanindot sa lugar.
Walay kwestiyon nga dako og ikatabang ang mga bike lane sa kampanya pag-modernize sa sistema sa transportasyon sa usa ka lugar.
Naghatag usab kini og kahamugaway sa mga bumabiyahe sa kadalanan.
Apan ang dakong problema mao nga, dinhi sa Sugbo, gipatuman kining maong mga bike lane sa mga karsada nga puwerte na ka hagip-ot, ilabina niining panahon nga grabe na ka daghan sa mga sakyanan nga nag-ilogay og espasyo sa kadalanan.
Maayo lamang didto sa SRP tungod kay ang bike lane wala man gipatuman sulod sa CSCR. Gibuhat kini pipila ka metro gikan sa karsada.
So, dili kini makabalda sa liboan ka sakyanan mag-agian sa CSCR matag adlaw.
Apan sa Colon Street, Osmeña Boulevard ug ubang dagkong dalan sa dakbayan, ambot kun mosaler ba kaha ang pagpatuman sa bike lane niining maong kadalanan nga hagbay rang adunay seryosong problema sa trapik.
Dili ba kaha moresulta na hinuon kini sa dakong kagubot?
Kay lagi magsige na man hinuon og imposar sa ilang katungod ang mga nagbiseklita ug nag-drive sa mga dagkong sakyanan bisan pa man sa kahagip-ot sa espasyo.
- Latest