Tim-os nga gugma sa Inahan

Gisaulog kagahapong adlawa ang adlaw sa mga inahan diin nagbaha gyud ang mga greetings sa mga anak sa social media ngadto sa ilang pinangga nga inahan.

Naa pay hilabihan ka taas nga message inubanan pa og mga hulagway nga nagpakita sa kahinungdanon sa inahan sa kinabuhi sa anak nga angayan lang sad gyud pasidunggan sa mga walay sukod nga paghigugma nga gihatag ngadto sa mga anak.

Apan naa koy nabasa nga artikulo sa social media nga mora’g joke ra pero undanon ug sakit pud kong makaigo kay mao man kadto ang kamatuoran.

Matud pa nga “kataas sa mensahe sa greetings sa anak ngadto sa inahan apan ultimo sa paghugas sa plato ug paghimo sa gimbuhaton sa balay wala gyud nahimo.”

Daghan kaayo ang naigo ani, bisan pa og pustahan, maapil ni sa expectation versus reality nga kutob lang pasikat sa social media apan ang tinood lahi ra.

Hinuon mas daghan man sad gihapon ang nagtamod sa ilang pagbati ngadto sa inahan nga mibati ug mihatag sa tim-os nga pasalamat ngadto sa mga inahan.

Sa panahon karon na-hook na ang mga tawo ilabi na ang mga bag-ong henerasyon ngadto sa social media hinungdan nga dako na kaayo og panahon sa pag-ukay sa mga artikulo ug paghimo sa mga status kay sa mag trabaho sa gimbuhaton sa balay.

Magsalig pud lagi kay ang inahan man dayon ang mosalo sa mga trabaho kinsa igo nalang sa pagbagutbot apan walay epekto sa mga anak kay nag-earphone man dili makadungog sa yawyaw sa inahan.

Bisan unsa ka nagger ang inahan wala kana magpasabot nga dili na mahal ang anak, nagyawyaw kana aron mapahinumduman ang anak sa mga responsibilidad.

Swerte kaayo ang mga anak nga anaa pay inahan nga magyawyaw kay kanang mga pulong nga manggawas sa iyang baba pangitaon na kana sa mga anak sa higayon nga wala na siya.

Kanang mga pulong nga nanggawas sa baba sa inahan gikan kana sa kasingkasing nga mibati alang sa kaayohan sa mga anak.

Ang akong inahan, tua naman sa langit apan walay panahon nga dili nako mahinumduman ang iyang gugma nga gihatag kanako.

Dili sa bias kay ako siyang inahan pero makaingon ko siya ang “The Best Mama” sa kalibutan.

Bisan og wala na siya sa kalibotan ang iyang gugma nagpabilin ug siya ang tighangyo ngadto sa Labawng Makagagagum nga dunggon ang mga pag ampo sa higayon nga duna kamiy sugabangon nga pagsuway.

Ang “I Love you mama”mubo kaayo nga pulong apan dako na kaayo kana nga kalipay kong mabati sa inahan.