Mensahe para sa bag-ong kinasal

Niadtong Mayo 1, gikasal ang kinamanghoran kong anak babaye didto sa San Pedro Calungsod Shrine, Archbishop Palace, D. Jakosalem Street, Cebu City.

Panahon sa wedding reception, ang mga kaparyentihan ug suod kahigalaan nga atua sa nagkalainlaing nasud nakahigayon gihapon pagpadangat sa ilang mga mensaheng gipasalida sa dakong screen tungod sa ka moderno na gayod sa atong teknolohiya karon.

Pulos nindot ang ilang gipaambit nga mga tambag ngadto sa bag-ong gikasal: Jude ug Jera.

Puno sa kahayag nga nag-iwag sa hustong dalan aron makab-ot ang matahom nga kalamposan sa kaminyoon.

Tanang mitambag, usa ray sekreto: sa kalipay’g kasakit, sa paghasmag sa kusog bagyo sa kinabuhi ug sa pagsagubang sa nagkadaiyang pagsulay, wala gyod sila mobulag sa Ginoo. Hinuon, gipahugtan pa ang ilang paggakos.

Unya, dihang ako nay mosulti, gipasabot ko si si Jera, akong anak ug Jude, iyang nabana, nga ang kaminyoon usa ka balaang gasa gikan sa Diyos.

Atubangan sa altar gihatagan sila Niyag krus aron papuy-on sulod sa ilang kasingkasing. Busa, ampingan kanunay.

Ang krus sa Ginoo gaan. Puno sa gugma, kaluoy ug kaluwasan. Kutob sa magpakasal sa simbahan, tagaan gyod Niya’g krus aron sa tanang panahon, dili kita makalimot pagsangpit-istorya Kaniya.

Tanang pag-ampo Iyang paminawon. Apan dili tanang gipangayo, ihatag.

Labi na kon kini makadaut ug wala sa hustong panahon. Kay kining krus nga Iyang gitunol sa bag-ong minyo, moprotehir, molipay ug mopabalaan.

Pero kon usa sa magtiayon mosalikway niining krus nga gihatag sa Diyos pinaagi sa pagluib o ubang matang sa sala nga makapahilak sa kapikas, sama ra nga nagbuhat siyag kaugalingong krus nga bug-at kaayong pas-anon.

Nga sa ato pa, tawo mismo ang nagbuhat og bug-at kaayong krus aron maoy unayog pas-an. Ug dili ang Ginoo.

Timan-i. Ang krus sa Ginoo makapahalangit. Samtang ang krus nga mugna sa tawo, makapaimpiyerno!

Busa, giingnan ko ang bag-ong kinasal: “Jude, you married the most beautiful woman in your life. Jera, you married the most handsome man in your life.

Maoy pilia ang krus nga gihatag sa Ginoo ninyo. And God assures both of you will enjoy the true beauty of marriage.

Ug namakpak ang mga ninang, ninong ug ubang guests nga nanambong.