Seryosong side effects sa bakuna
Kon may kaila kang mga opisyal sa Malakanyang ug mga sakop sa Presidential Security Group (PSG) nga nagreklamo nga way tarung kinatulgan, palihug ingna sila nga mahimong mao ni ang hinungdan: Segun sa Strategic Advisory Group of Experts (SAGE) sa World Health Organization (WHO) seryuso ang side effects sa bakuna sa Sinopharm.
Matud sa mga eksperto nga samtang 78.1% ang ka-epektibo sa bakuna batok sa COVID-19, mas ubos sa pangangkon sa China nga 79.3%, nihit ang ebidensiya nga luwas para sa mga may comorobidities ug nagpangedaron og 60 pataas.
* * *
Nagpadayon pa ang pagtuon sa SAGE sa Sinopharm ug wa pa mapahibawo sa publiko unsa ang seryoso nga side effects nga mahimong mahiagoman sa pipila ka pasyente.
Sa interes sa nasud ug katawhang Pilipinhon, hinaot nga mapasabot dayon sa mga eksperto kon naglakip ba sa mosunod:
Pag-usab-usab sa istorya bahala na kon di motakdo sa aktuwal nga mga panghitabo;
Paglimutlimot sa mga nahimo ug nasulti, labi na gyod sa mga saad sa kampanya sa piniliay, sa nangaging katuigan;
* * *
Paglubag sa kasaysayan—sampol lang, nga si Marcos mao diay ang kinamaayohan nga presidente ug nga si Lapulapu di taga Mactan kay taga Mindanao diay;
Pagtagu-tago taliwa sa pandemiya aron lang pagsungog sa iyang mga kaatbang;
Atubangan sa paspas nga pagsulbong sa mga kaso sa COVID-19 pagsaling-it gihapon sa bugalbugal sa mga biyuda sa mga polis nga nangamabdos sa paghikay sa ilang mga benepisyo;
Pagpasalig nga maoy labing una nga magpabakuna sa Sinovac ug Sputnik V pero ang gipili mao ang Sinopharm nga wa pa masusi sa Food and Drug Administration (FDA) ang kaluwas ug ka-epektibo;
* * *
Paglangay sa ayuda sa mga naapiki sa lockdowns pero paspas nga pagpabaha sa pundo para sa task force kansang bugtong trabaho mao ang pagpasangil sa tanang nanaway niya nga mga komunista;
Paglingiw sa binilyon ka pesos nga balor sa gikawat nga mga isda ug giguba nga corals ug ubang katigayonan sa West Philippine Sea bugti sa usa ka milyon ka bakuna;
Pagbinastos sa mga Pilipinhon nga niawhag pagpanalipod sa nasudnong teritoryo ug pagtila sa China nga maoy nangilog og teritoryo; ug
Pagpanghagit og debate nga wa siyay interes ni katakos nga apilan.
* * *
- Latest
