Ang bino ug ang COVID-19

Mahatagan na gyud og katagbawan ang giuhaw nga tutonlan sa camel nga nahubsan sa taas nga panahon sa dakbayan sa Sugbo human gilibkas na ang liquor ban.

Bitaw, sa kataposan puwede na molala og bino sa mga bar o kadtong mga establisemento nga pwede maka-serve og alak. Maayo man kini nga kalamboan dili lang sa manginginom kondili alang usab sa mga tawo nga nagsalig sa ilang panginabuhi sa ingon niini nga industriya.

Apan ang paglibkas sa liquor ban adunay kauban nga dakong responsibilidad natong tanan kay dili ikalimod nga tinubdan kini sa pagkuyanap sa virus.

Mahimo seguro sa sinugdanan murag masunod pa ang protocol kay tin-aw pa kaayo ang panghunahuna apan ang delikado kong mahubog na kay maglagsik na ang mga laway ug dili na mapugngan ang kaulingon magtagay sa susamang baso, magdikitdikit na.

Sa ingon niini nga sitwasyon, unsa man ang sangpotanan? Maayo lang kong pulos COVID-free ang mga nalango sa bino pero kong usa sa mga nag-inom positive, aw kahibawo na kita sa resulta.

Padayon ang pag-ubos sa kaso sa COVID-19 sa Sugbo ilabi na sa siyudad nga nahimo kaniadtong epicenter nga nabansagan pa gani ang mga Sugboanon nga gahi og ulo.

Apan nahimo natong napugngan o napaubos ang kaso taliwala pa man sa pagtaas sa ubang dapit sama sa NCR+. Nagpasabot lang nga ang mga gihimo sa mga Sugboanon epektibo busa angayan nato kining ipadayon ug dili luagan.

Mao bitaw kini ang nahitabo sa ubang dapit nga miluag kay niubos ang kaso apan kakulahaw lang nigrabe ang sitwasyon. Dili na kita maka-afford nga mobalik sa panahon nga giterorista kita sa kahadlok sa COVID-19 kay puwerte gyung lisora. At least nakaginhawa na kita, literal nga nakaginhawa kay ubos kaayo ang occupancy rate sa mga tambalanan ilabi na ang ICU beds.

Kay gitugotan naman ang pagpamaligya og bino, ang mga manginomay ug ang namaligya kinahanglan magmatngon kay nag-atang ra gyud ang virus og higayon ahya mokombate.Kong sa bangag pa, nag-atang ang virus nga makasulod sa higayon ang bantay mawagtang, inig sulod ani mamahimo na dayong monster nga lisod na sumpoon.

Sa mga namaligya diay sa mga balay o mga convenience store puwede ra mobaligya apan dad-on ra sa balay ug didto na imnon, mas luwas ang ingon niini.