Nakaila na ba mo?

Lima ka buwan na lang, moduso na og Certificates of Candidacy kadtong gusto nga molansar og mga katungdanan sa kagamhanan alang sa 2022 elections.

Gimando sa Commission on Elections nga kadtong mokandidato sa election unya sa May 9, 2022, kinahanglang moduso sila sa ilang COC gikan sa Oktubre 1 ngadto sa Oktubre 8.

Bisan og nakaduso na sila sa ilang mga COC, ang mga kandidato sa nasudnong pwesto sama sa pagkapresidente, bise presidente, senador ug Party-list groups, opisyal sila nga makapangampanya sugod Febrero 8 hangtud sa Mayo 7.

Ang mga kandidato sa mga lokal nga katungdanan sama sa kongresista, mayor, gobernador, sakop sa Provincial Board, ug mga konsehal sa siyudad ug lungsod, ang opisyal nilang kampanya magsugod Marso 25.

Pagka karon, kadtong mga nagtinguha nga molansar nagsugod na gani pagsuroy sa lainlaing dapit.

* * *

Dinhi sa Dakbayan sa Sugbo, mora’g anam-anam na nga motumaw ang mga ngalan sa modagan pagkamayor, kongresista ug konsehal.

Gani, gihinayhinayan na namo sa paghimbis kon kinsa ang mas lig-on nga kandidato nga paborito sa mga botante. Sa pagkakonsehal hinuon sa grupo nila ni Mayor Labella ug sa kaatbang nga grupo nga mao ang BOPK, dili pa kompleto ang mga ngalan.

Pero nagsugod na sila sa pagmiting aron pagpili og kinsa ang maglangkob sa ilang grupo.

Nindot kaayo kay anam-anam na nga milutaw ang ilang mga ngalan.

Hinuon, ang final list sa mga kandidato adto ra gyud nila ibutyag sa hapit na ang adlaw sa pagduso sa mga COC sa Comelec.

Sagdi lang, moabot ra ang higayon nga atong hashasan dinhi ang mga kandidato kon anaa na gyud ang kompleto nga lista.

* * *

Nakalaag mi ug ang mga kauban nakong reporters sa Cebu City Hall didto sa Moalboal kaniadtong Sabado ug Domingo. Dili malalis nga nindot gyud ang dagat didto kon itandi dinhi sa siyudad.

Bisan ang diha sa Olango Island dili makabentaha sa katin-aw sa tubig didto.

Apan ang problema mao ang kalayo sa Moalboal ug ubang mga nindot nga beach sa Badian ug ubang kalungsoran sa south.  Nakaingon ko nga aron daghan ang madasig pag-adto didto, kinahanglang pangitaan gyud og paagi nga mapalapdan ang karsada paingon sa maong mga dapit.

Dili problema ang kalayo, apan ang makapa-discourage sa mga tawo pag-adto mao ang grabeng traffic diha sa mga dapit gikan sa Minglanilla, Naga, San Fernando paingon na sa Carcar.

Pwerteng hinaya sa pagsibog sa mga sakyanan diha nga mga lungsod. H

usto kadtong plano nga maghimo gyud og coastal highway sa maong mga dapit paingon sa Dakbayan sa Sugbo.