Naanad na sa ka wa nilay klaro
Naghinamhinam kong nimata og sayo niadtong Biyernes, Abril 30, aron pagsusi buhi na ba ang online registration system para sa National ID. Kay ang National Economic and Development Authority (NEDA) man ang nipahibawo, giuna nako pag-abli ang ilang website. Way hisgot sa online registration.
Nisunod ko og adto sa website sa Philippine Statistics Authority (PSA) nga maoy nagpatuman sa P31 bilyones nga proyekto.
Mingaw pa sa tirana. Dayon nang udto kong nasultihan sa akong mga higala sa PSA nga ang online registration dumalahon diay sa website sa Philippine Identification System (PhilSys).
* * *
Pagkatultol nako sa philsys.gov.ph, gisugo ko pagmatuod nga di ko robot pinaagi sa paghatag sa akong mobile phone number o email address. Gihatag dayon ang akong numero ug nagpaabot sa gipasalit nga one time pin (OTP). Human sa lima ka minuto, gisugo ko pagtuslok sa kahon nga “Resend OTP.”
Wa gihapoy nahitabo. Maong nisuway ko og butang sa akong email address. Pero naungot gihapon. Pagpalaban nako sa taga PSA, ila kong giingnan nga nihagsa ang sistema sa PhilSys kay 40,000 ang nagkadungan sa pagparehistro.
* * *
Sa kasaba sa ilang hype sa kasayon sa sistema uban ang kasayoran nga kapin pa sa 80 milyones ka Pilipinhon ang wa pa ma-rehistro, lisod tuohan nga nahagba dayon ang ilang sistema dihang gidasmagan og 40,000 ka clicks sa pagsugod sa online registration.
Sa akong pagsuwat ini, kapin na sa 24 oras human sa pagkaging sa sistema, wa pay timaan kanus-a mabuhi pagbalik.
Kuyaw nga magpaabot ta hangtod sa Lunes una matarung kay wa man igdungog ang mga IT sa gobyerno nga magtukaw og weekend.
* * *
Pero di na ikahibulong ang labing uwahi nga bulilyaso. Kapin na sa tuig human sa pagsugod sa pandemiya, wa gihapon matarung ang sistema pag-ihap sa mga kaso sa COVID-19, pagpalambo sa contact tracing, pagpalapad sa swab testing ug pagtarung sa hospital utilization.
Nahagba nang ekonomiya ug nakapangutang na og binilyon ka pesos, wa pa gihapoy klaro ang pag-apud-apod sa mga ayuda, kanus-a makabuylo ang pagpamakuna ug ang pagbalanse sa pag-abli pagbalik sa mga negosyo sa way paglawog sa populasyon sa mas mananakod ug mas makamatay nga bag-ong variants sa kagaw.
* * *
- Latest
