Jn. 15;5: Halayo kanako wala kamoy mahimo

Mayo 2, 2021: Ikalimang Domingo sa Pasko sa Pagkabanyhaw

Mga Pagbasa: Buh. 9;26-31/Sal. 22/1 Jn. 3;18-24/Jn. 15;1-8

Kini gyud ang usa sa mga paborito nakong passage sanglit nagpahinumdom man kini sa dakong gugma sa Ginoo alang kanato.

Dugang pa, pahinumdom kini nga kun ugaling kita magpahilayo sa Ginoo mamahimo kitang mamatay ug dili na gyud magmabungahon pa. Kay lagi halayo kaniya wala man kitay mahimo.

Dunay mga hinungdan kun nganong ang tawo mamahimong malayo sa Dios. Naglangkob kini ning mosunod:

1. Ang naghinubrang pagsalig sa kaugalingong katakos. Katakos nga kon buot hunahunaon mamahimong taya nga makamantsa sa kaugalingon. Ang mga tawo nga niangkla niini mamahimong magtuo nga mabuhi siya bisan walay Dios ni Relihiyon.

2 Ang pagkabilanggo sa bahandi, kabantog, ug gahum.

a. Bahandi nga kun dili gani matarong og gamit moresulta man sa waldas nga pagpuyo sa kinabuhi.

Ang bisyo ug kahilayan mahimong haduol sanglit ang kwarta ug bahandi makadani man ngadto sa paggamit niini sa walay igong padulngan labina kun wala ang hustong pagsabot kalabot sa kahimoan sa bahandi diha sa atong kinabuhi.

b. Kabantog nga nahimong makahilo sa hustong panghunahuna ug mabuot nga panlantaw nga sa kalibutan diin ang tawo wala lang mag-inusara duna siya’y kuyog.

c. Gahum labina kun anaa ka sa posisyon. Kon isipon kini nga kahimanan sa pagpangalagad sa Dios nan, maayo kini apan kon isipon kini nga kahimanan sa pagpalambo sa kaugalingon nan, sa Dios gyud ikaw mahilayo.

Anaa kang Jesus ang kinabuhing tunhay ug angayan lamang nga kaniya kita makig-uban.