Ayaw ninyo ipaimbargo

Makalingaw kaayo pamation ang pagpasabot ni LTO-7 Regional Director Victor Caindec kabahin sa binuang nga gihimo sa pipila ka dealer og mga motorsiklo.

Gitataw ni Caindec nga dunay mga dealer og motorsiklo gipautang ang ilang mga baligya, apan ilang gireport sa LTO nga ang mga motor kuno gibayran og “cash” sa ilang kustomer.

Pero sa gihuptan nila nga rekord sa ilang opisina, makita nga ang tinuod, ang pagbaligya gipaagi sa data-data nga pagbayad ug mahal kaayo ang kantidad.

Kay wa man nila itug-an ang tinuod nga kantidad sa halin, gamay ra usab ang bayranan nilang buhis ngadto sa kagamhanan.

Mituo ko ni Caindec kay ako mismo, nakakuha og motor nga giutang nako gikan sa kompaniya nga gipasakaan nila og kasong tax evasion.

Wa gyud ihatag kanako ang original nga Certificate of Registration hangtud nga naimpas nako sa pagbayad ang motor nga miabot ang kantidad og P72,000.

Ang motor nga akong gi-assumed sa pagbayad, duha pa ka buwan gikan sa pagpalit sa “first buyer,” apan gipaimbargo na lang sa nakapalit.

Nahibulong ko kay ang ngalan sa rehistro, nakabutang na man sa ngalan sa “first buyer” apan ang original CR, didto ra sa dealer.

Husto si Caindec nga kadtong namalit og motorsiklo pinaagi sa installment, unya kon ang kopya sa Certificate of Registration sa motor makita nga anaa na kini sa ilang ngalan, unya way gibutang nga “INCUMBERED,” ayaw ninyo ipaimbarko kon dili mo makabayad.

Nganong imbargohon man sa mga dealer nga nakarehistro na man sa LTO nga ang maong mga motor gipanag-iya na man sa mga namalit?

Makita sa rekord didto sa LTO nga giduso sa dealer nga gibayran og cash ang maong mga motor.

Nakasabot gyud ko sa isyu nga gibulgar ni Caindec ngadto sa katawhan, ug angay siya nga pasalamatan niini kay gipakgang niya ang mga binuang sa pipila ka mga nagbaligya og motor.

Tinuod, malipay ta nga dunay mga negosyante nga nagpautang og mga motor aron nga makaangkon og sakyanan kadtong mga tawo nga dili makaabot pagpalit og motorsiklo pinaagi sa cash.

Apan husto usab si Caindec nga dili angay’ng pasalamatan nato ang maong mga dealer kay ang pagbaligya nila gipaagi usab kini sa “Financing” nga sila ra gihapon ang tag-iya.

Kay gipaagi man sa kini Financing, momahal na ang kantidad sa motor kay ila man nga gipatungan og interest. Sama sa gipalit nakong motor nga P50,000 ra unta, apan ang akong nabayran niabot og P70,000.