Kinabuhi dili kabayran og salapi

Mao gyud unta kini ang tambanan sa tanan sanglit wala may si bisan kinsa ang dunay katungod nga mohunos sa kinabuhi sa usa ka tawo, apan unsaon man kong ang pamilya sa biktima sa krimen walay ikasarang sa pagkab-ot og hustisya nga dili gani maka-afford sa paghipos sa ilang minatay?

Kini ang sitwasyon sa pamilya sa onse anyos nga si Justince Jay Ferrer sa sitio Ypil, Barangay Basak San NIcolas dakbayan sa Sugbo nga midawat nalang sa P80 mil gikan sa kampo sa nakapusil patay sa bata.

Si Justine nakabsan sa kinabuhi human gipusil sa security guard niadtong Sabado dihang gipasanginlan nga nanghilabot og scrap metal sa construction site kauban ang iyang grupo nga gilangkoban gihapon sa mga bata.  

Ang bata ang napahimungtan sa gwardiya tungod kay matud niya nga ang grupo niini kanunay lang manghilabot ug dili pa igo mamato pa gyud sila nga naigo na gani ang mga gwardiya.  

Giliog gyud sa pagpusil sa gwardiya ang bata nga maoy hinungdan sa iyang kamatayon, kong moingon ang gwardiya nga igo lang siyang nagpasalba  sa armas nganong sa liog gyud sa bata nitugpa ang bala?  

Ibutang lang nato nga nakasala ang bata, pusilon gyud diay?

Grabe pud ka brutal kong ingon niini ang basehan nga hunosan man lang og kinabuhi ang usa ka bata kay nanguha og scrap metal.

Na-scrap na gani nagpasabot nga dili na mapuslan nga butang nganong ihikaw pa man nila, nganong dili naman lang ihatag aron makatabang pa sa mga bata kay seguradong naglisod gyud sila.    

Mahimo man unta nga gidakop ug gitugyan ngadto sa mga otoridad aron matugyan usab nga sa DSWD kay sa patyon. Ang nakapait kay murag maimpas ang hustisya kay mibayad man ang kampo sa suspek ngadto sa pamilya sa biktima bugti sa dili pagpasaka og kaso, P80 mil nga gigamit nila sa pagpahiluna sa lawas niini, pagka gamay ra pud, hinuon priceless o dili mahimong presyohan ang kinabuhi sa tawo.    

Sumala sa inahan nga gidawat nila ang kwarta aron naay magamit, gustohon man nilang makab-ot ang hustisya apan wala silay ikasarang sa kaso.    

Makahinuklog ang gidangatan ni Justine tungod kay uhaw siya sa pagmahal sa iyang mga ginikanan sanglit ang iyang inahan toa man sa norte nga layo kaniya samtang ang iyang amahan toa man usab sa bilanggoan.    

Ang mga apohan nalang niini ang nag atiman kaniya busa nangita ang bata og mga higala aron mapuno ang kahaw-ang sa iyang gibati nga mihatod usab sa iyang kaalautan. Kay kabus agi murag wala may nagpakabana sa pagkuha og hustisya sa bata nga klaro man kaayong gipatay, asa naman ang mga children’s rights advocates?    

Pait palandungon nga sa kantidad nga P80 mil mahulog lang sa wala ang kaso sa batang biktima sa krimen. Hinuon ang pulis man kuno ang mobarug nga complainant kong dili mokiha ang pamilya pero mas lig-on gyud unta kong mismo ang pamilya ang mopasaka og kaso batok sa suspek.