Maayong lakang sa mayor

Gitaktak sa iyang trabaho ang kaswal nga empleyado sa Cebu City Hall nga nadakpan sa gihimong operasyon sa kapolisan sa Barangay Babag, dakbayan sa Lapu-lapu niadtong miaging semana.

Ang empleyado nailhan nga si Robeth Sable Delos Santos, 36 anyos ug nagpuyo sa Barangay Suba, siyudad sa Sugbo, ug usa ka administrative aide III sa Cebu City Hall.

Si Delos Santos nadakpan sa gipahigayon nga buy-bust operation sa mga sakop sa City Intelligence Branch (CIB) sa Lapu-lapu City Police Office pinaagi sa pakigalayon sa mga sakop sa Philippine Drug Enforcement Agency (PDEA) sa maong lugar.

Nakuha kang Delos Santos ang mitimbang sa 158 gramos nga gituohang Shabu nga nagkantidad og kapin sa P700,000.

Si Cebu City Administrator Atty. Floro Casas Jr. mitug-an nga gimandoan siya ni Mayor Edgardo Labella niadtong Huwebes sa gabii sa miaging semana sa pagtang-tang kang Delos Santos sa iyang trabaho. Ang maong kamandoan gipalig-on kini sa usa ka memorandum nga pinirmahan sa mayor.

Maayo ang gihimo ni Mayor Labella tungod kay ang maong matang sa mga empleyado nga iyang gitang-tang dili ug wala gayoy luna sa buhatan sa gobiyerno.

* * *

Gimando sa hepe sa kapolisan sa Rehiyon 7 ngadto sa mga sakop Criminal Investigation and Detection Group (CIDG-7) ang pag-imbestigar sa kamatayon sa polis nga si Celso Colita kansang kamatayon nagbilin og mga pangutana kun nagpakamatay ba o gipatay.

Ang buot ipasabot niini nga wala kaayo motuo ang hepe sa kapolisan sa Rehiyon 7 nga nagpakamatay si Colita.