^
EDITORYAL - Way pagkaong mausik

EDITORYAL - Way pagkaong mausik

Ian B. Melecio (Banat) - April 23, 2021 - 12:00am

Karon nga naklaro na nga dili supak ang gobiyerno aning mga gipang-organisar nga mga community pantries sa nagkadaiyang mga barangay, mas nidaghan ang mga tawong gustong maghimo niini aron makatabang sa ilang mga silingan nga nanginahanglan.

Dinhi sa Cebu City, ang Market Operations Division mipahibalo nga dunay ilusad nga mga community pantries ang mga vendors sa Carbon Public Market. Usa kini ka maayong tinguha nga unta buhaton sab dili lang sa mga taga Carbon kondili hasta sa mga satellite markets sa siyudad.

Pagkatinuod lang, daghan kaayong mga “biya” o mga “tinagak” nga mga utanon, prutas, mga lamas ug uban pang mga preskong paninda sa Carbon nga sa trak sa basura lang ang destinasyon kay wa mangahalin.

Maayo kining nahunahunaan sa mga vendors sa Carbon, ang malawos karon lisud ng halinon pagkasunod adlaw ug mas maayong ipanghatag nalang makatabang pa sila sa ubang gipanggutom.

Gawas anang mga regular nga manghagdaw og mga mapuslan pang utanon, lamas ug prutas  aron ibaligya, dunay ubang mga tawo nga dili para baligya ang tuyo sa ilang pagpanghagdaw sa basurahan kondili para gyud sa pagkaon sa lamesa sa ilang pamilya.

Kun tinud-on sa mga vendors nga ipanghatag ang ilang mga wala mangahalin nga baligya daghang pamilyang walay ikapalit og pagkaon ang maluwas. Wa say mausik nga pagkaon.

Anugon ra man gud kun sa basurahan lang tanan mapadulong kining maong mga pagkaon nga duna man daghang mga tawong gipanggutom. Mahimo sab kining buhaton sa mga kan-anan, fastfood chains, mga hotels ug uban pa.

Dili lang unta abusaran sa uban aron nga dili sab mawad-an og gana ang mga vendors nga gustong mopaambit ngadto sa uban.  Mas maayo kun kolektahon sa siyudad ang mga sobra-sobrang baligya ug ipanghatud kini sa kabarangayan sa mga depressed sitios.

Aning paagiha sab maiban-ibanan ang posibilidad nga magkatinakdanay ang mga tawo sa coronavirus.

Aron sab kini paglikay nga magdasok ang mga tawo diha sa Carbon nga ang tuyo mao lang ang community pantries.

Naila ang mga Pilipino aning Bayanihan Spirit, haom kaayo kini buhaton karong panahona.

COMMUNITY PANTRY
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with