^

Nganong kurog sa paghinatagay

ARANGKADA - Leo Lastimosa (Banat) - April 22, 2021 - 12:00am

Kon nahibulong ka nganong sa usa ka bahin ang Malakanyang ug ubang ahensiya nipasidungog sa pagkatap sa community pantries sa tibuok Pilipinas pero sa pikas nga bahin wa badlonga ang mga buhatan sa gobiyerno nga nanghasi ug nipasangil sa mga tigpasiugda nga nagplano sa pagtumpag sa pamunoan ni Presidente Rodrigo Duterte, ayaw.

Sa unang tan-aw, mora ni og ang naandan nga kayagaw sa mga tinudlo sa presidente nga, tungod sa kakuwang og direksiyon sa tagulilong niyang liderato, nag-iyahay. Pero ang pinalawoman nga pakisusi mobisto nga simbolo ni sa pamunoan nga nahadlok sa iyang anino.

* * *

Nindot paminawon silang Presidential Spokesperson Harry Roque (nga nihulagway sa community pantries nga bayanihan), Justice Secretary Menardo Guevarra (nga di mapugos ang mga tigpasiugda sa paghatag og bisan unsang kasayuran ni pagpirma og bisan unsang dokumento), Interior Secretary Eduardo Año ug PNP Chief Debold Sinas (nga way polis nga nanghasi sa mga tigpasiugda).

Pero wa silang kabaraw sa National Task Force to End Local Communist Armed Conflict (NTF ELCAC) nga way lipudlipod nga nitulisok sa community pantries nga gipasiugdahan sa mga rebeldeng komunista. Igo lang nilusot si Roque nga may kagawasan sa pagsulti ang mga opisyal sa gobyerno nga sukwahi og baruganan.

* * *

Ang wa niya isulti mao nga way makabadlong sa NTF ELCAC. Gawas nga pulos hawod ang nagdumala, abunda ang budget nga naaprobahan bisan gihulagway sa mga senador ug kongresista nga pork barrel. Ila-ilaha ang ubang mga sakop sa NTF ELCAC aron makasabot nganong way makatandog nila:

Chairman si Presidente Duterte; vice chairman si National Security Adviser Hermogenes Esperon; mga sakop silang Año (DILG), Guevarra (DOJ), Sinas (PNP), Defense Secretary Delfin Lorenzana, AFP Chief Cirilito Sobejana, DPWH Secretary Mark Villar, Budget Secretary Wendel Avisado, Finance Secretary Carlos Dominguez, DAR Secretary John Castriciones, DSWD Secretary Rolando Bautista, Education Secretary Leonor Briones, Communications Secretary Martin Andanar ug uban pa.

* * *

Bisan sa pangangkon nga siyay labing popular sa kasaysayan, si Presidente Duterte nahibawo sa katandugon sa iyang gahom, salamat sa mga palpak sa pandemiya, China, drugas, pangurakot ug sa hapit tanan.

Mao nga samang hadlok sa lugaw ni Bise Presidente Leni Robredo, kurog sab sa libreng mga utanon nga giladlad sa kadalanan.

leolastimosaa@gmail.com

RODRIGO DUTERTE
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with