^

Dasigon...dili hadlukon

BALITAHOM - Atty. Jose Marie N. Poblete (Banat) - April 22, 2021 - 12:00am

Sa tuyo nga mahadlok ang katawhan sa COVID-19 ug aron sila magpuyo sa ilang tagsatagsa ka panimalay, adunay gi-display ang kapolisan nga hitsura ni “Kamatayan” sa usa ka checkpoint sa San Mateo, Rizal. Gisaway kini sa mga netizens kay alang kanila dili solusyon batok sa COVID-19 ang pagpanghadlok.  Matud pa bitaw sa Islam scholar nga si Hamza Yusuf, “Ang pagpanghadlok taktika nga gigamit sa mga tawo nga buot mokontrolar, ug napamatud-an nga kini epektibo”.  Hadlok na gani ang katawhan nga magutman, hadlokon pa gyud nga mamatay.  Di kaha maayo nga dasigon lang?  Fezteleern!

Pagkadili masabot

Sa sukwahi nga balita, bisan sa paglibkas sa “stay-at-home” order nga giimponer kanhi matag adlaw’ng Dominggo sa Barangay Guadalupe, Cebu, diyotay ra gihapon ang mga tawo nga mogawas sa ilang tagsa-tagsa ka panimalay sa maong adlaw.  Kinaiya sa tawo nga kon did-an, moliskuhag hinoon, apan kon luagan, di na sab maggunok. Angay tun-an sa kagamhanan ang psychological nga aspeto ug epekto sa COVID-19.  Sa paglanat sa panahon, apektado na, dili lamang ang ekonomiya, kon dili labaw pa ang psychological nga bahin sa kinabuhi sa katawhan.  Matud pa sa linya sa awit, “Pagka-dili masabot”.  Saoonz!

Di na manistil sultihan

Masaligon ang Malacañang nga sa kapulihay mohawa ra ang mga sakyanang pangdagat sa China diha sa West Philippine Sea.  Ang gibasehan sa maong pagsalig mao ang suod kuno nga panaghigalaay sa Pilipinas ug China. Kay dili man mahimo’ng gubaton ang China, da-ogon na lang natô sa padungog-dungog.  Nakapahinumdum kanako sa amahan nga misuna sa iyang anak-ulitawo kon nakapadayag na ba kini sa iyang gibati ngadto sa babaye nga iyang gimahal.  Niini, misulinga lang ang anak sa pagtubag, “Aah, kon ang babaye may kabuot, di na manistil sultihan”.  Pagkatoytoy!

Lawgawon kay naunhan

Ni’ng pag-uso sa mga “community pantry,” misalmot na usab ang Simbahan pinaagi sa pag-awhag sa mga kapari-an ug mga miyembro sa simbahan  sa pagpabarog niin sa ilang tagsa-tagsa ka parokya. Gihulagway nga usa ka maayong pamaagi ang community pantry sa pagsabwag sa hiyas sa pagka-manggihatagon.  Apan subô palandungon nga adunay opisyal sa DILG nga namulong nga kinahanglan pa’g permit aron makapahigayon sa maong kalihukan. Abi kay nasapawan man sa ila untang katungdanan, manglawgaw na lang ang gobyerno bisan sa maayong kalihukan.  Na-unswaa!

Binilyon ang tugbang

Matud pa sa NEDA, gibanâ-banâ nga mokabat sa P83.3 bilyones nga kita sa mga mamumuo ang posibleng nahanaw sulod sa lima ka semana nga pag-lockdown sa Metro Manila ug kasilinganan’g mga probinsya. Lockdown ang sagad nga solusyon sa kagamhanan matag higayon nga mosaka ang kaso sa COVID-19.  Gi-imponer ang maong strikto’ng lagda sa mga tawo sa kagamhanan kinsa walay puas pagdawat sa sweldo, ngadto sa mga tawo nga dili intawon mokita kon dili makatrabaho.  Matud pa sa pagya sa taga-Bantayan, “Kon maoy magdaghan, diyotay ra”.  Madahaan!

COVID-19
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with