Risgo sa siyudad

Ang chairman sa CEMVEDCO nga si Erwin Gok-ong mipadala og suwat ngadto sa Cebu City Council ug giingnan niya ang mga konsehal nga dunay mga lagda sa Joint Venture Contract nga bug-at ug risgo kaayo sa siyudad.

Gibatbat ni Gok-ong ang lagda sa Section 8.2 sa kontrata (Obligations of the City) nga kon dili dayon makatuman ang Dakbayan sa Sugbo mag-atubang kini og dagkong multa. Apan kon ang Megawide maoy mapakyas pagtuman sa ilang obligasyon, way gilatid nga multa kanila.

Pananglit, malangan ang City Hall sa pagtugyan sa Project Site ngadto sa Megawide, nga tukoran sa giingong modernized Carbon Public Market building, ug sa uban pa nga mga lagda, aw risgo kaayo nga makamulta ang siyudad.

Gipasabot ni Gok-ong ang mga konsehal nga ang tanang “protection clause” sa kontrata nga gisudlan sa siyudad, tua gyud kanunay pabor sa Megawide ug alkanse ang dakbayan.

Naglibog usab si Gok-ong kay sa kontrata gipasabot gyud nga ang Megawide dunay “financial standing, resources” ug may kapasidad pagpundo aron matuman ang iyang obligasyon.

Apan nakabantay si Gok-ong nga may bahin sa kontrata nga ang Megawide gitugotan nga mokuha sa pundo nga gamiton niya sa proyekto gikan sa huwam.

Nahadlok gyud ang mga vendors nga kon mahuman na ang giingong modernized market building, mosaka pag-ayo ang abangan sa mga stalls ug, mapugos usab ang mga vendors sa pagpamahal sa prisyo sa ilang mga baligya.

Usa sa mga lagda sa Section 12.3 (e) “Failure of the City to increase Rental Rates in the Public Market...” nga ibase sa Market Code, makamulta na niini ang siyudad.

Unya, pananglit og makwenta sa Megawide nga alkanse gyud sila, mahimo nga ang 50 ka tuig nga kontrata, lugwayan pa nila og laing 25 ba ka tuig.

Husto ang sugyot ni Gok-ong nga angay’ng kwentahon kon pila ang kantidad sa mga yuta nga gamiton sa Joint Venture Project aron nga maoy basehan sa pagbahinay sa kita, dili kay ang Megawide mohatag lang og P50 milyones inig-abot sa lima ka tuig, apan dili pa kini limpyo kay mogasto pa man ang siyudad sa paghipos sa mga basura, sweldo sa mga traffic enforcers, magmintenar sa kahusay ug kalinaw ug uban pa.

Apan ang mga tindera gyud nga moabot og dul-an sa 6,000 kay dili man sila masulod sa pagamugnaon nga balhinan nila. Matud pa nga mag-shifting ra sila.

Sa ato pa, duna gyuy mga adlaw nga dili sila makapaninda.

Sumpayan pa nato ang paghisgot niining maong isyu.