Wa nay kahadlok sa coronavirus

Tan-aw nako, mora’g naanad na lang gyud ang katawhan nga kanunay’ng nagsaka ang gidaghanon sa mga tawo nga natakboyan og coronavirus.

Niining semanaha, kanunay’ng labaw sa dies mil ang matakboyan kada adlaw, apan mora’g gipalapos na lang sa dunggan sa katawhan nga makadungog sa balita.

Ingon sa wa na sila batia og kahadlok. Dili sama kaniadto nga mora’g magpangurog ang katawhan nga daghan ang nangatakdan sa virus.

Misamot nga wa na sila mahadlok kay dunay ubang tagtungod sa mga pasyente nga mitug-an nga bisan dili COVID-19 ang sakit, giingnan sila sa mga doktor nga ipaingon na lang nga COVID-19 aron kuno sila matabangan.

Matabangan kay dako man ang itabang sa kagamhanan sa mga tawo nga matakboyan og Covid kon aduna sila’y PhilHealth.

Bisan ako, nakabantay nga dili na kaayo “isog” ang virus karong panahona. Kaniadto gud, makakita kita og mga video nga didto sa laing nasud, mokalit lang pagkatumba ang usa ka tawo nga natakboyan og COVID-19.

Advertising
Scroll to continue

Karon, mora’g madala na lang og tuob ang mga hilanat. Kon magpa-ospital ka nga gihilantan, aw posible nga ingnon ka dayon nga natakboyan og COVID-19.

* * *

Gipahibawo diay ni Mayor Edgar Labella nga ang kapin sa 11 mil ka Persons with Disabilities dinhi sa Dakbayan sa Sugbo hatagan og tag P5,000 nga cash assistance sa siyudad karong Mayo 8.

Ila kining hinabang para sa buwan sa Enero, Pebrero, Marso, Abril ug sa Mayo. Tan-awa, dili ba nindot gyud nga tingubon sa paghatag?

* * *

Alang sa mga nagpaabot sa sumpay sa pagtuki nato sa kontrobersiyal nga isyu bahin sa pagtukod sa modernized Carbon Public Market, karong Martes na lang sab.

May mitambag man gud nga dili lang nato isunod kay aron matuki usab nato ang ubang isyu nga angay usab nga masayran sa uban.

Apan paabota karong Martes, kay mas lawom ang pagtuki nato sa maong isyu, ug ibutyag na nato ang ubang detalyi nga wa pa kaayo ninyo mahibaw-i.

* * *

Nindot ang plano sa DPWH nga pagtukod og duha ka flyovers diha sa eskina Osmeña Boulevard ug P. del Rosario Street, ug laing usa didto sa eskina Natalio Bacalso ug V. Rama Avenue.

Kon matukod na ang maong mga flyovers, nagpasabot nga mopaspas na ang dagan sa mga sakyanan. Apan kinahanglang himoon na lang One Way ang Panganiban Street gikan sa Natalio Bacalso Avenue. Ang laing angay’ng butangan og flyover mao ang eskina MJ Cuenco ug General Maxilom Avenue sa Caretta ug sa Gorordo Avenue eskina Echavez Street, ingon man didto sa Mabolo.

Show comments