Airplane ambulance sa mga pasyenting adunahan?

Sa pagkapuno na sa mga healthcare facility sa National Capital Region NCR+ asa naman padulong ang mga pasyente nga mataptan og COVID-19, ilabi na kadtong adunay severe condition?

Ma pobre o datu patas kuno tanan didto nga mabalibaran gyud kay wala man lagi kapahilunaan nila.

Gani naa may mga high-profile personality nga kutob ra gani sa mga temporary room o tent nga maghuwat kong naay bakante nga kwarto.

Si kanhi Presidente Erap Estrada taudtaod nga natanggong sa ambulansya ayha siya nakasulod sa hospital, apan ambot kong dili pa siya kanhi presidente madawat ba kaha siya.

Ang OPM icon nga si Claire Dela Fuente nakabsan gyud sa kinabuhi sa tent sa hospital kay wala pud lagi siya madawat kay no available room.

Pipila lang sila sa kamatuoran sa pait nga kahimtang sa mga hospital didto, walay pakialam ang sila kong makabayad o dili kay magdepende sa availability sa kwarto ug mha kahimanan.

Tungod sa maong sitwasyon, ang kadtong nga datu kaayo nga maka-afford og abang og mga sakyanan sa kahanginan o kadtong naay kaugalingong eroplano dinhi man kuno moari sa atoa sa Sugbo magpa-hospital.

Usa ka kasaligan nga tinubdan ang misulti kanako niini apan wala pa usay kompirmasyon gikan sa mga opisyal sa gobiyerno.

Hinuon gamay man kaayo ang occupancy rate ang mga hospital sa Sugbo ug makadawat pa gyud sila og mga pasyente. Dili pud seguro makapuno sa mga tambalanan ang mga rich people kay talagsa ra man seguro ang maka-afford og private plane aron dinhi sa Sugbo magpa hospital.

Napadala man gani ang Sugbo og mga medical frontliners sa kaulohan walay rason nga dili dawaton ug atimanon ang mga pasyente gikan didto.

Basta maseguro lang ang proper procedure sa ingon dili sila makatakod kay wala kita masayod kong unsa nga variant sa virus ang anaa kanila.

Basin katong virus kusog kaayo manakod, pastilan gyud delikado nga kita na usab ang maka-experience sa nahitabo didto sa kaulohan. Maayo man sila kay duna may kwarta nga ikabayad sa eroplano nga magsilbeng ambulansya. Apan kadtong nga pobre ay ambot nalang.