Kon dagat na ang ilogan
Kon nag-anam na ka og kalibog sa nagkainit nga lalis sa paugat sa China sa pagpanghasi, pag-okupar ug pagtukod og mga baseng militar sa atong giangkon nga mga teritoryo sa West Philippine Sea (WPS) ginamit ang binuang nga sukaranan nga ang badlis sa karaan nilang mapa nimatuod nga ila ang tibuok South China Sea (SCS), makatabang tingali sa pagpasabot ang mosunod nga duha ka numero:
80% sa mga negosyo sa tibuok kalibotan niagi sa kadagatan; ug
30% sa mga negosyo sa kinadak-an ug kinadatoan nga mga nasud niagi sa SCS.
* * *
Ang kaagresibo sa China pagpamugos sa ilang pag-angkon sa tibuok SCS, nga bisan ang suod nilang relasyon ni Presidente Rodrigo Duterte wa kapugong sa ilang nag-aliwaros nga awhag paghakop sa WPS, nanukad sa kamatuoran nga sa tanang nasud sa kalibotan sila ang hingpit nga nagsalig sa SCS.
Kumbinsido ang China nga mameligro ang ilang ambisyon pagpuli sa Estados Unidos isip kinadak-ang ekonomiya sa kalibotan kon di makontrolar ang SCS. Maong kinahanglang papason ang pagdaog sa Pilipinas sa Permanent Court of Arbitration sa United Nations nga nibasura sa ilang pangangkon.
* * *
Ni-enter the dragon ang mga Amerikanhon pinaagi sa pagpada sa mas gamhanan nilang mga barko sa gubat sa WPS di tungod sa ilang gugma sa Pilipinas. Makatabang sa tanang hingtungdan kon atong kalimtan ang gipatuo sa atong katiguwangan nga ang mga Pilipinhon may espesyal nga luna sa kasingkasing ni Uncle Sam.
Tungod sa atong nahimutangan, ang Pilipinas importante sa pagpabiling gawasnon sa pagsud-gawas sa mga negosyo sa Estados Unidos ug alyadong mga nasud. Mao ni hinungdan nga wa mobiya ang mga Amerikanhon bisan gipalayas nang ilang mga baseng militar niadtong 1991 ug giinsulto silang Presidente Duterte pagbanos niya sa Malakanyang.
* * *
Kon makahunahuna na og tarung human sa pakigduwa og tagotago nilang Senador Leila de Lima ug ubang mga kaatbang, hinaut nga makaamgo si Presidente Duterte nga ang iyang pagtila di kapugong sa ambisyon sa China pagkontrolar sa SCS ug iyang pamalikas di makapalayas sa mga Amerikanhon.
Kay nagtuong maoy kinangilngigan nga arkitekto sa foreign policy, magkapuliki si Presidente Duterte og panagang nganong nagpailad ni Presidente Xi Jinping ug nganong gitun pagbalik ang pagbinastos sa mga Amerikanhon.
- Latest
