500 Years YOC molabay ra busa tim-os nato kining handumon

Karong adlawa ang dakong kalihokan sa kasaulogan sa ika 500 ka kasumaran sa paghangop sa Krisyanismo sa nasud diin usa sa mga sentro ang Sugbo nga giisip nga Cradle of Christianity.

Ipahigayon unyang alas 2 sa hapon ang reenactment sa unang bunyag diha sa Plaza sa Sugbo atubangan sa Cebu City Hall o kilid sa Magellan’s Cross.

Higpit nga protocol ang ipatuman diin magtinabangay ang kapolisan uban ang mga force multiplier nga moabag sa pagpatunhay sa kalinaw sa venue ilabi na sa social distancing.

Isunod dayon pagka alas 4 sa hapon ang Pontifical Mass nga ihalad sa Papal Nuncio sa Pilipinas Archbishop Charles Brown nga tambongan sa limitadong gidaghanon sa mga tawo apil na ang kaparian ug mga opisyal sa kagamhanan.

Pagka alas 5:30 sa hapon idelarar ang Basilica del Sto. Nino ug ang Imahen sa Balaang Bata isip national cultural treasure.

Unta kining naasoy’ng selebrasyon dako ug bongga kay talagsaon ra man nga mahitabo ang 500 years. Apan gumikan sa pandemic, limitado kaayo apil na ang  mga gustong motambong.

Gani gahapong adlawa adunay tiguwang babaye nga miduol kanako samtang naghimo ko og estorya didto sa Plaza sa Sugbo. Iya ko nga gipangutana kong makasulod ba kaha siya karon nga naa man siyay quarantine pass ug ID. Ako siyang gingnan nga kadtong ID o accreditation lang ang mahimong pasudlon aron makontrol ang mga tawo tungod sa sitwasyon karon nga pandemic.

Gustohon man nato og sa dili ingon na gyud niini ang mahitabo dili lang sa YOC kondili apil sa mga umaabot nga mga mahinungdanon nga kalihokan diin giunhan sa nakalabay’ng Sinulog.

Maayo gani kay gitugotan pa nga mapahigayon ang nilawas nga YOC celebration kay hingpit na gyud nga giwagtang at least mabalik tan-aw nato ang atong kasaysayan.

Dili pud malikayan ang kabalaka sa uban nga basin og mao na usab kini ang hinungdan nga mosaka pagbalik ang COVID-19 cases nga miubos na unta ni karon.

Para nako bisan og adunay mga tawo nga motambong basta motuman gyud sa protocol sa pagsul-ob of facemask ug face shield dili na seguro mataptan, samotan kong magbutang og alcohol matag karon ug unya.

Maoy ako og kutob lang sa ulo ang shield, mao ni angayan hinumduman sa mga tawo nga dili na maghuwat nga badlongon sa mga otoridad.

Maayo nga mapahigayon ang mga ingon niinin nga mga mahinungdanon nga kalihokan kay sa magsige kita og kahadlok nga maoy mopriso sa atong huna huna nga dakong babag sa atong gustong himoon.

At least malimtan nato ang kabug-at nga gibati kay ang dulot niining maong selebrasyon mao man ang inspirasyon sa atong pagtuo ngadto sa Dios.

Ang 500 Years dugay pa kaayo mahitabo sa pag-usab. Kong atong palabyon karon segurado gyud nga dili na kita makaabot. Talagsaon ra kining mahitabo.

Apan gikinahanglan nga dili lang kutob karong adlawa o tuiga ang paghanumdum kon dili puy-an nato ang gibilin nga hiyas ug mithi sa atong pagtuo.