Politika sa bakuna
Nabakunahan na ang mga medical frontliners ingon man ang ilang mga kaabag dinhi sa dakbayan sa Sugbo. Kagahapong adlawa nagdungan usab sa pagpabakona sila si Mayor Edgardo Labella ug Bise Mayor Mike Rama. Hapit na tanan nga frontiners ang nabakunahan.
Apan ang pagbakuna sa mga Barangay Health Workers sa dakbayan sa Sugbo nahisama sa pagkolekta sa basura nga gilain ang malata ug dili malata. Kining maong kasinatian natagamtaman sa mga Barangay Health Workers sa Barangay Apas.
Dihang gitakda ang pagbakuna sa mga Barangay Health Workers, miadto dayon sa vaccine center ang mga Barangay Health Workers sa Barangay Apas apan sa ilang pag-abot gipangayoan sila og identification card.
Kay walay gikapakita kay wala man niini ang mga Barangay Health Workers nga ang naghatag sa ilang suholan mao ang barangay, wala sila bakunahi.
Kay ang unahon sa pagbakuna mao kadtong mga Barangay Health Workers nga ang naghatag sa ilang suweldo mao ang siyudad sa Sugbo.
Hangtod karon ang mga Barangay Health Workers sa Barangay Apas nga dili ang siyudad sa Sugbo ang nagsuweldo wala pa gihapon mabakunahi. Hinuon, human mapadya ang reklamo, bakunahan na ang nahisgotang mga health workers, apan wala pay klaro kanusa. Basin bakunahan sila kon wala nay bakuna.
* * *
Gukdon sa kapolisan sa dakbayan sa Sugbo ang illegal numbers game nga suwertres. Kini tungod sa mando ni Mayor Edgardo Labella kinsa nakamatikod sa naghitak nga illegal nga sugal nga nahimotang sa daplin sa kadalanan.
Pero nganong gukdon pa man sa mga polis ang illegal numbers game nga suwertres nga wala man kini modagan. Nagpundo raman kini sila daplin sa kadalanan.
Gani dili man ni mistil pa nga pangitaon kay wala man kini sila motago. Nagpabantang raman ni sila daplin sa kadalanan.
Kinsa kaha ang nakakuwarta sa naghitak nga illegal nga suwertres?
- Latest
