^

Missing kay nahutdan og lusot?

ARANGKADA - Leo Lastimosa (Banat) - April 10, 2021 - 12:00am

Kon nagkinahanglan ka pa og dugang mga timaan una makumbinser sa kataphaw sa liderato sa kampanya batok sa COVID-19, hinaut nga di ka manghuy-ab ning among lista. Kay mao ra ning listaha dihang nagkarakara ang pamunoan ni Presidente Rodrigo Duterte sa niaging tuig. Masulub-on ming mopahibawo nimo nga mas nagkarakara pa sila karon kapin na sa tuig human sa pag-ulbo sa pandemiya.

Sayon ang pagpasangil nga wa sila makat-on sa mga leksiyon sa pandemiya. Pero nahadlok ko nga mas grabe ang ilang atraso: Nagtuo nga sakto ang ilang mga sayop.

* * *

Ang pag-awas sa mga ospital nahitabo na sa Sugbo ug ubang bahin sa nasud tungod sa paspas nga pagsulbong sa mga kaso sa niaging tuig. Nangamatay ang mga pasyente nga wa maatiman sa mga ospital tungod sa kalangay sa pagpalapad sa kapasidad sa mga ospital ug isolation facilities.

Abunda ang mga pasidaan sa mga eksperto sa lapad nga tinakdanay sa Metro Manila. Pero hangtod nga napugos sa pagpatuman sa enhanced community quarantine sa niaging semana, niinsistir ang Malakanyang nga kontroladong sitwasyon ug nasobrahang mga panghadlok sa nag-ung-ong nga krisis.

* * *

Imbes masuhito na unsay labing epektibong mga lagda, naglalis gihapon ang mga ahensiya sa gobyerno:

Mga polis nitanggong sa doktor nga nagbisikletang way face shield pero ang Department of Health niingon nga makadugang sa aksidente kon mag-face shield ang mga nag-drive og sakyanan;

Nitambag ang Department of Justice nga community service ray silot sa mga makalapas sa ECQ pero mga polis sa Cavite gipasanginlang namugos og lisod nga ehersisyo nga nakapatay sa ilang dinakpan; ug

Barangay tanod sa Bulacan kahibawo nga essential ang lugaw.

* * *

Ang kahaw-ang sa liderato maoy pabilo sa kayagaw. Gawas nga nag-iyahay ang mga naa sa ubos, ang kakuwang sa direksiyon nakapatibuwaag sa nihit nang daan nga kuwarta ug kahimanan sa gobyerno. Maong nakabuylo ang mga nagpa-ginansiya sa katalagman nga, wa ka masayop, pulos alyado sa pamunoan.

Sa kinagrabehang bahin sa pandemya, nipakita ang health secretary para sa ribbon cutting ug photo ops. Ug nawagtang na sab ang presidente. Wa gani kahatag og klarong kasayuran nahadlok bang matakdan sa iyang mga guwardiya o nahutdan na ba lang og lusot sa iyang mga bulilyaso.

* * *

 leolastimosaa@gmail.com

COVID-19
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with