Duque ug Domingo

Ang nangamatay sa COVID-19 sa Pilipinas, as of April 6, 2021, miabot nag 13,817. Kada adlaw, nagakadaghan ang nangatakdan. Adunay nakarekober. Apan may mga kinabuhi pod nga mapukan.

Dili kinabuhi sa tawo ray nawala, hasta mga kapanginabuhian! Milyon ang nakulba’g kaldero. Milyon ang nawad-ag trabaho. Milabad na pag-ayo ang ulo sa mga tawo. Gusto sila nga masakpan na sa kagamhanan ang epektibong tambal nga hingpit molupig ni COVID-19.

Apan unsa bay gibuhat ni Department of Health Secretary Francisco Duque III ug Food and Drug Administration Chief Eric Domingo aron matabangan si Tatay Digong pagsumpo sa grabe nang pagtinaptanay ning gikahadlokang virus?

Pareha ba ilang hunahuna sa kang Tatay nga mao ang pagluwas sa nagkapusngapusnga nang katawhan?  Or, maoy mipasulabi sa kahiladman ang pagbusog sa ilang kaugalingon lamang, bahala nag mangamatay sa tumang kagutom ug pagtinakdanay ang mga kabus?

Samtang may mga manggihunahunaong doktor sa atong nasud sama sa mga Fabunan brothers ug Dr. Allan Landrito, kinsa naningkamot pagpangita o pag-imbento’g tambal batok COVID-19, diin ang presyo gaan ra, si Duque ug Domingo pirmeng sirado ang dughan paghangop-suporta niini.

Inay tabangan nga madali ang pag-aprobar, gibabagan hinuon!

Pero’g mga nagkadaiyang corona vac nga imported? Bahalag mahal kaayo, larga dayon! Fair ba?

Si Dr. Allan Landrito mikonpirmar nga tanang pasyenteng gipatumar niyag ivermectin (anti-parasitic drug), isip alternatibong medisina nga pangbatok sa COVID-19, pulos nangaayo ug naprotektahan. Unya, walay natalang nangadaut ug nangamatay. Nga sa ato pa, safe. Barato pa!

Apan gipahunong kini ni Duque ug Domingo, kay wala kuno marehistro kining tambala. Diin, sa tinuoray, matud pa ni Atty. Larry Gadon, kinsa tigtomar sab niini, nga dugay nang narehistro ang Ivermectin. 40 years na.

Wala lang ma-renew.

Ning panahon sa emerhensiya, diin tanan nagkinahangla’g alternatibong tambal pangproteksiyon sama sa ivermectin, ultimong mga kongresista ug senador, kinsa mimatuod sa kaepektibo niini, mihangyo sa Malakanyang nga itugot na ang pag-usar niini.

Basin baya kon kini na ang tubag gikan sa langit sa mga pag-ampo sa katawhan. Unya, nganong giharangan man ni Domingo ug Duque, uy?

Nagpasabot ba kini nga wala silay pagmahal sa tabangonong katawhan?

Sanglit, maoy ilang gipalabi ang kaugalingon nilang kabulahanan?

Pastilan, kaluoy natong Pinoy!