Daw pahumot sa ilok

Walay kasibot ang DOH-Central Visayas sa rekomendasyon pag-imponer og mga travel restrictions niadtong nag-gikan sa giingon’g mga “high risk” or kritikal nga lugar, kay kini usa lamang ka “knee-jerk” o kalit nga reaksyon sa sitwasyon.  Hinunoa, mas maayo pa kuno ang pag-imponer sa mga mahinungdanon’g lakang sama sa pag-screen, pag-testing ug pag-isolate.  Ni’ng panahon sa pandemiya, sulagma lang nga makasinati kita’g puno sa sentido kumon nga stratehiya gikan sa kagamhanan.  Tinuod gyud tingale ang panultihon nga, “Ang “common sense” sama sa pahumot sa ilok diin kadtong nagkinahanglan niini, dili o panagsa ra mogamit niini.  Baya no!

Maglana og potot

Nanawagan ang pundok nga AGHAM-Advocates of Science and Technology ngadto kang Presidente  Duterte nga mangulo kini sa kusganon’g pag-awhag sa China pagpangayo’g pasaylo ug sa paghunong na sa ilegal nga pag-okupar niini sa West Philippine Sea.  Tanan nasayod nga layo ra sa tinuod nga mangayo’g pasaylo ang China sa ilang gibuhat. Sa kahimtang sa Pilipinas, diin huyang ang atong armadong kusog, daw kinanaas ra sa unas ang atong hiniusang tingog batok China. Gubat sa laway ra ang tinuod nga lingtunganay sa awhag sa AGHAM.  May’pa maglana og potot!  Saoonz!

Isabong na lang

Nanawagan si House Deputy Speaker Rufus Rodriguez sa Amerika nga mopahigayon og daghang pag-patrolya sa West Philippine Sea taliwala sa pagtumaw sa mga sakyanan sa China sa Julian Felipe Reef. Buot sa Kongresista nga ipadayag sa buhat ang giingon sa Amerika nga suporta niini sa Pilipinas sa kasungian diha sa maong kadagatan. Kay dili man nato makaya ang China, ato na lang sila isabong sa Amerika.  Ginaingon sad bitaw nga “Ang pagpangayo’g panabang wala magpasabot nga ikaw mahuyang kon dili nagpasabot nga ikaw maalamon ug may hiyas nga mapainubsanon”.  Tabang “Yô Sam!

Change strategy na!

Matud pa sa NEDA, ang pag-imponer sa labing hiktin nga pagkwarentinas ug ang paglugway niini dili makapa-ubos sa gidaghanon sa kaso sa COVID-19 sa nasud ug makapaala-ot pagsamot sa kapin 350,000 ka tawo.  Daw naglugitom ang kaugmaon sa katawhan ni’ng pamahayag sa NEDA.  Wala na’y luna ang pagmagahi ug paghinambog gihapon sa mga hingtungdan sa kagamhanan ni’ng higayona. Dili gayud masulbad ang suliran kon sama ra gihapon ang atong panghunahuna niadtong panahon sa pagtumaw pa sa maong suliran.  Change strategy na!

Kapnon agi’g sampol

Mipasidaan ang DILG sa mga opisyales sa kagamhanang lokal nga motamud gayud sa lagda ug deadline nga gilatid alang sa pagpang-apod-apod sa emergency assistance aron dili sila mag-atubang og kaso mahitungod niini.  Tukma ang maong pahimangno.  Daghan sa mga lokal nga opisyal nga kina-iya na ang “pagkapon” sa hinabang nga alang unta sa katawhan.  Ni’ng higayona, maayo unta kon tinud-on ang bahad sa DILG nga kapnon ang maong mga opisyales gikan sa katungdanan kon mapamatud-an unya nga sad-an.  Angay sampolan!