^

Modernized Carbon Market

RENBOR PATROL - Rene U. Borromeo (Banat) - April 8, 2021 - 12:00am

Napul-an na tingali mo sa isyu kabahin sa Coronavirus Disease nga maoy kanunay natong hisgotan.

Hisgotan nato ang kontrobersyal kaayong isyu kabahin sa pagtukod og modernized Carbon Public Market. Unahon nato pagbatbat ang isyu gikan sa proponent sa project.

Nangangkon ang proponent sa maong proyekto -- ang Megawide Construction Corporation -- nga nindot na unya kaayo ang Carbon Market.

Gipakita na sa Megawide ang hulagway sa Carbon Market kon mahuman na ang proyekto, tingali, mahuman mga lima ka tuig gikan karon.

Ilang nakumbinser ang mga opisyal sa Dakbayan sa Sugbo nga nakigpirmahay kanila og Joint Venture Contract nga ang Megawide maoy mopatukod sa moderno nga Carbon public market.

Way gasto ang siyudad sa pagpatukod sa bag-ong Carbon Market. Kini maglakip sa Carbon Market Unit-1, Unit, 2, Unit 3, ug laing building nga anha pagatukoron sa gitawag og Freedom Park ug Warwicks Barracks.

Ang proyekto sa Megawide, moabot diha sa kilid nianang Cebu City Finance Center building, ang dapit lapas na sa Unit 3, ug ila pa gyud nga apilon pag-develop ang dapit kilid sa Compania Maritima.

Nangangkon ang kadagkoan sa Megawide nga ang ilang proyekto, makadani og daghang turista nga moanha sa Carbon, ug sa samang higayon, daghang pumapalit nga gikan sa Metro Cebu nga madani na pagpangumpra diha.

Mogasto ang Megawide og binilyon ka pesos pagpatukod sa maong proyekto, ug aron mabawi nila ang ilang nagasto, gitugotan sila sa kadagkoan sa Dakbayan sa Sugbo nga sila ang mangolekta sa abangan sa mga tindera nga mogamit og stalls, sulod sa 50 ka tuig.

Ang termino mahimo pa nga lugwayan kon makita sa Oversight Committee nga mag-manage sa merkado, nga wa pa mabawi sa Megawide ang ilang nagasto.

Matud sa kadaghanang sakop sa Cebu City Council, dili mabalaka ang mga tindera nga momahal ang abangan kay ang sugyot sa pagpaumento sa abangan, mag-agi gihapon kini sa City Council.

Pagka karon, kapin sa 5,000 ka tindera sa mga stalls sa Carbon Market ug mga ambulant vendors, nga apektado sa pagahimoon nga proyekto.

Ang Megawide, magtukod og building sa dapit nga nahimutangan sa Freedom Park ug Warwick Barracks aron adto ipahimutang ang maong mga tindera.

Apan kay ang pagamugnaon nga building tukma ra man sa mga 1,500 ngadto sa 2,000 ka vendors, gisugyot nga magbanos-banos ang mga tindera paggamit sa stalls.

Dinhi usa ta kutob, sumpayan nato kini karong Sabado. Dayon, atong isunod ang argumento sa mga vendors ug sa katapusan, ang atong baruganan.

CARBON MARKET
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with