Nagpakagahi lang sa ulo tungod sa kahumok na sa ilang tiyan sa gutom

“Mga gahi’g ulo, dili gyud mopatuo pirme magsupak supak sa protocol.” Mao kini ang kanunay nato nga madunggan sa ubang mga opisyal sa kagamhanan sa mga tawo nga magsige og gawas sa panimalay taliwala sa gipatuman nga quarantine protocol. Apan segurado gyud kaha sila nga ang kagahi sa ulo sa mga tawo ang nagtukmod kanila nga mogawas sa ilang balay? Alang nako dili makiangayon nga hukman og ingon niini ang naasoy’ng mga tawo sanglit duna gyud silay katarungan sa ilang gihimo. Kong duna pa lang silay kapilian nganong mogawas gud sa ilang balay nga kahibalo sila nga peligro apan wala silay mahimo tungod kay nakadepende kanila ang kinabuhi sa ilang pamilya. Dili sila gahi og ulo kon dili nagpakagahi nalang aron mogahi ang ilang tiyan nga hagbay nang nagkutoy sa kagutom. Kong ikaw usa ka amahan o inahan buhaton buhaton gyud nimo ang tanan aron makahatag og pagkaon ug ubang mga panginahanglan ang mga anak.

Ang nahitabo sa nakalabay’ng tuig nga gipaubos sa enhanced community quarantine ang halos tanang dapit sa nasud, nasubli na usab sa mga dapit didto sa kaulohan nunot sa hilabihang pagsaka sa kaso sa COVID-19 didto.

Makaluluoy kaayo ang mga tawo nga nahikawan sa kahigayonan nga makatrabaho ilabi na kadtong wala makadala og mga essential requirements sama sa certificate of employment ug uban pa.

Gani naay usa ka media personality sa kaulohan ang mikomento nga unta silotan ang mga tawo nga dili mopatuo. Sayon kaayo mosugyot apan alang sa hingtungdan unfair kaayo, silotan diay ang tawo nga naningkamot aron mabuhi ang pamilya.

Tinuod taas kaayo ang kaso sa COVID-19 ilabi na sa kaulohan nga miabot gani sa 10,000 kapin apan pila man niini ang adunay symptom? Majority niini ang wala ganiy gipamati sa lawas. Napuno na kuno ang mga tambalanan didto sa COVID-19 patients, ang pangutana kritikal ba ang tanan o pareho lang sa ubang mga dapit nga dunay gusto lang magpa admit kay mahadlok nga mograbe ang sakit.

Sa Sugbo taas man ang kaso apan napaus-os man kini bisan og walay ECQ ug gamay ra usab ang mga nalandig sa tambalanan. Kon nahimo kini sa Sugbo nganong dili sa ubang mga dapit. Ang kalisod sa mga tawo susama sa dakong kalbaryo nga giagian karon ug ang pagkawala sa ilang panginabuhian sama ra paglansang kanila sa krus ilabi na kuwang ang suporta sa kagamhanan. Bisan unsaon sa pag-amping, gani daghang mga datu ug opisyal sa kagamhanan nga gipang COVID-19 nga ang ilang palibot limpyo ug estrikto pa gyud ang protocol.

Nganong dili man pud sila nawongon og ingon nga mga gahi og ulo, ngangong sa mga mayokmok ra man mahan-ok ang mga ingon niini nga pagbasol.

Maluwas man sa virus kong dili mogawas sa balay apan mamatay man pud sa kagutom ang pamilya kay walay gikaon. Busa sa dili pa mohukom nga gahi og ulo timbang timbangon una ug tan-awon nga naay pagsabot ang kahimtang sa usa ka tawo. Hinuon kadtong mga tawo nga klaro kaayo nga nagpabadlong mao to ang angayan nga patagmon pinaagi sa pagsilot sa mga gihimong kalapasan.