Tak-opan, ablihan

Kini ang matawag natong duwa ning kasamtangang kahimtang sa pandemiya.

Warning matud pa sa palasyo ngadto sa mga simbahanan labina ning panahon sa Semana Santa kay lagi aron mapakgang ang coronavirus.

Samtang ang mga spa’s mga masahean, mga gyms mahimong ablihan basta 75 percent lamang kay lagi sila giisip nga mga essentials samtang ang simbahan ambot lamang.

Dili pwedeng tambongan ang paghugas ni Kristo sa mga tiil sa mga tinun-an samtang makaayo kaayo for relaxation ang paghugas sa mga tiil aron hiloton.

Dili maayo nga sud-ongon ug pamalandongan ang pagpas-an ni Jesus sa Krus alang sa katubsanan sa katawhan apan mahimong pas-anon ang barbel dumbbell aron mamahimong pormado ang lawas.

Dili maayong magpundok aron mag-ampo apan mahimo ra diay ang mga party ug mapasaylo ang mga nagpasiuna niini.

Giratsada ang desisyon ang bisan unsay applicable sa dakbayan gihimong applicable sa mga probinsiya bisan pa man kun managlahi ang konteksto niini. Mao nga tungod sa coronavirus tak-opan og balik ang simbahanan.

Apan bisan pa man niini mahinungdanon kaayo nga atong ablihan ang mosunod nga mga mahinungdanong bahin sa atong kinabuhi:

1. Una ang atong tagsatagsa ka mga mata sa pagsud-ong nga dili tanang gilatid nga kamatuoran dili tanan matuod. Ang uban nila bakak.

2.  Ikaduha, dili tanang pag inistrikto ang pagaisipon nga pagpanalipod kondili panlupig ug pagpahimulos.

3. Ikatulo, dili tanang pagtabang pagaisipon nga libre kondili mahimong isipon nga utang kabubut-on, kahimtang nga lisud kaayo bayaran.

Nahinumdom ko hinuon sa paglingaw sa bata hangtud siya makatulog ug kini mao ang close open kun ang pagsira ug abli sa atong mga kamot samtang nagtutok kita sa atong mga inahan uban ang ilang pahiyom bisan kun sila mismo biktima sa mga bana nila nga bugtong buhat mao lamang ang pagpadako sa ilang mga itlog.

Hinuon dili tanan kay dunay mga bana man usab nga nahimong biktima sa mga hustler nga mga asawa. Close Open!