Ang modernong Carbon Market

Duna koy amigo nga nanimpalad didto sa America. Of course, tungod kay duna man siyay igong kahibawo ug abilidad,nakatrabaho dayon siya.

After sa dul-an 30 ka tuig, nabalik siya dinhi sa Sugbo, ug daku ang iyang katingala sa mga kausaban nga iyang nakita, among others, ang mga high-rise buildings, mga malls ug mga dagkung department stores, mga restaurants ug mga 5-star hotels, ubp.

Apan, matud niya, pagkakita niya sa Taboan ug Carbon markets nahugno siya. Alang kaniya. daku pa’g kulang ang pag-uswag sa dakbayan. Tiaw moy pila na na ka tuig ang mga merkado sa Carbon ug Tabuan, ug tapus sa kapin sa usa ka gatus ka tiug, hangtud niining mga gutloa, mao lang gihapon ang Carbon ug Tabuan .You call that progress? Panahon pa kini sa atong mga lolo ug lola ug ilang mga lolo ug lola.

Apan karon, makabaton ra unya kita’g usa ka modernong Carbon Market nga mahisama na unya sa mga mall ug sa mga dagkung department stores. Lisud katuhoan nga mahitabo kini dinhi sa Sugbo. Too good to be true, matud pa.

Of course, samtang ang kinabag-ang Sugboanon mi-welcome ug nalipay niining maong kaugmaran, adunay uban nga dili makadawat og kausaban, bisan kon kini makaayo sa kinabag-an. Nasulbad na man tingali ang suliran sa mga naapektahan nga mga manindahay, ang mga market vendors, diin sa ceremonial ground breaking nga gihimo, gibutyag ni Mayor Edgar Labella nga maoy iyang hunahuna nga i-waive lang una ang rental panahon sa relocation period.

“I would like to urge the City Council to support me kay dili lang dili patas-an ang abang sa mga vendors during the relocation period pero atong i-waive ang abangan sa atong mga vendors during the relocation period. So, maghangyo ko sa City Council nga suportahi ko ninyo ini,” nagkanayon si Labella.

Mipasalig si Labella nga walay manindahay ang ma-displaced inigsugod na sa konstruksiyon.

Ang City Market Administrator, si Irvin Cabales mibutyag nga kapin sa 200 ka vendors ang ipahimutang lang una sa temporaryo nga facility.

Pagkakaron, matud ni Cabales nagpadayon ang pagpanghatag sa Certificate of Recognition ngadto sa mga ambulant vendos, nga maoy mogarantiya nga makakuha sila’g luna sa bag-ong Carbon  market (puhon).

In the meantime, maoy atong panghinaut nga magkasabut ra gayud ang tanang nalambigit niining maong “long over due” na nga proyekto; ug dili unta maabtan og laing usa ka tuig ang pagtuon ug pag-review niining maong tinguha pag-modernize sa Carbon market.

Matud pa, usa lamang ka ceremonial ground breaking ang gihimo. Sa ato pa, aduna pay taas nga panahon pag-review sa napirmahan na unta nga Joint Venture Agreement (JVA). Unya, kon unsa man nga mga suliran o mga loopholes nga madiskobrihan, mohatag sila’g mga solusyon o kasulbaran niini, aron dili mosamot kalangan ang maong proyekto.

Matud ni Louie Ferrer, chief corporate affairs ug branding officer sa Megawide Construction Corporation, “it is important for the Megawide and the vendors to have a good relationship so that the redevelopment would run smoothly.”

Hinaut nga mahusay da kining tanan.