Segurohon nga walay mabiyaan sa kalamboan

Wala pa gani nasugdan ang redevelopment sa Carbon Public Market apan aduna nay pipila ka mga nagprotesta tungod sa mga kabalaka nga maapektohan kuno ang ilang panginabuhi.

Hinuon dili man usab malikayan nga mahadlok sila kay ang panginabuhi man nila ang nakapusta niini. Buot lang nila nga makaseguro kay duna man usab silay pamilya nga buhion.

Bisan pa man sa mga gipanglatag nga kasegurohan sa private developer ug sa lokal nga kagamhanan, wala gihapon mahimutang ang ubang mga vendors ug ubang nanginabuhi sa palibot sa Carbon.

Apan nganong dili man lang hatagan og kahigayonan nga pamatud-an ang kabag-ohan sa merkado? Tan-awon usa kong dehado ba ang kinabag-an sa ipatuman nga development.

Dili makalikayan nga dunay adjustment period diin maglisod seguro ang uban sa paghangop kay dili maka-move-on sa naandan. Apan sa ngadto ngadto maanad ra man.

Kong namakak ang kagamhanang lokal ug ang developer, hala sudyaan ug paninglan sa ilang kababakon. Apan dili pa man nila mahimo kana sa pagkakaron kay wala pa man seguro mahitabo ang ilang gikahadlokan.

Anugon ang kahigayonan nga mamahimong world class nga merkado ang Carbon kong dili kini mahinayon.

Mao na kini ang higayon nga maka-compete ang merkado sa Carbon sa mga supermarkets nga dawaton man og sa dili maoy option karon sa mga pumapalit kay convenient kaayo, aircon ug luwas ang parkingan.

Nahinumdum ko kaniadto sa giistorya sa sa usa ka tindera sa Carbon nga mihulagway nga himatyon ang Carbon tungod sa kompetisyon sa mga supermarket sa mga mall.

Kong mahinayon ang redevelopment mao na kini ang higayon nga mag-level up na ang estado sa merkado nga dili na mabasta basta sa pagtan-aw sa uban.

Basta maseguro lang usab nga matuman ang gisaad sa mga hingtungdan ug walay matumban sa kalamboan.